Tarazdyq oqýshy Mendeleev olımpıadasynda altyn medal jeńip aldy
ASTANA. 3 mamyr. QazAqparat - Tarazdyq oqýshy Abylaı Shahızadaev 24-30 sáýir aralyǵynda Máskeýde hımııa páni boıynsha ótken 45 halyqaralyq Mendeleev olımpıadasynyń altyn medalin jeńip aldy.
Bul halyqaralyq bilim jarysyna Baltyq, TMD, Rýmynııa, Bolgarııa jáne Makedonııa elderiniń oqýshylary qatysty, dep habarlady «Daryn» respýblıkalyq ǵylymı-tájirıbelik ortalyǵynan.
Sondaı-aq, osynaý bilim baıqaýynda soltústikqazaqstandyq Vladımır Doljnıkov, almatylyq Vladıslav Kamysbaev, jambyldyq Ernur Tólep pen Nurbek Serikuly jáne astanalyq Mıras Bekbergenov kúmis medaldarmen marapattaldy.
Al pavlodarlyq Daler Baıdilov, almatylyq Murat Sultanov jáne astanalyq Ázim Amanjolov qola medaldardy enshiledi.
Tarazdyq Ernur Tólep sondaı-aq «Hımııa boıynsha úzdik tájirıbe» atalymynda maqtaý qaǵazymen marapattaldy jáne BASF hımııalyq kontserniniń yntalandyrý syılyǵyna - Germanııaǵa joldamaǵa ıe boldy.
