Tarazdyq oqýshy bıznes jobasyn júzege asyrýǵa 2 mln teńge utyp aldy

TARAZ. QazAqparat – Taraz qalasyndaǵy Nazarbaev Zııatkerlik mektebiniń on ekinshi synyp oqýshysy Dana Qurmanbek qurǵaq sarysý óndiretin bıznes-jobasyn júzege asyrýǵa eki mıllıon teńge utyp aldy. Onyń bıznes-bastamasyna «Atameken» Ulttyq kásipkerler palatasy «Bıznestiń jol kartasy-2020» baǵdarlamasy aıasynda qoldaý tanytyp otyr, dep habarlaıdy QazAqparat tilshisi.

Jas bıznesmen óz ıdeıasyn jaqyn arada iske asyrýdy josparlap otyr. Josparyn júzege asyrýǵa ınvestıtsııa daıyn deıdi ol.

«Bizdiń elge qurǵaq sút sarysýy Reseı men Belarýsten ımporttalady. Al ony ózimiz óndire bastasaq qosymsha shyǵynnan arylar edik. Qurǵaq sarysý 150-den astam ónim túrlerin shyǵarýǵa qoldanylady. Bul - kosmetıkalyq jáne farmatsevtıkalyq quraldar, shujyq jáne kondıterlik ónimder, balmuzdaqtyń túrleri», – deıdi Dana.

Aıta ketý kerek, Dana Qurmanbek - baǵdarlamanyń eń jas qatysýshysy. Onyń jasy nebári on segizde. Danamen qatar baıqaýǵa zeınet jasyna deıingi tájirıbeli kásipkerler de qatysqan. Oqýshy bıznes-josparyn jetekshisi, ekonomıka pániniń muǵalim-moderatory Álııa Jýsanbaevanyń basshylyǵymen muqııat quryp, eseptegen.

«Sút óniminiń qaldyqtaryn qaıta óńdeý arqyly qurǵaq sarysý óndirý jobasyn Taraz qalasyndaǵy Nazarbaev Zııatkerlik mektebiniń bazasynda júzege asyrǵaly otyrmyz. Eńbegimiz bolashaqta óńirdiń jáne eldiń ekonomıkasyna erekshe paıda ákeledi degen úmittemiz», – deıdi Álııa Mahtabekqyzy.