Tarazdyq fototilshi týraly fılm halyqaralyq festıvalde júldege ilikti
TARAZ. QazAqparat - Qazaqstandyq tórt birdeı týyndy detektıvti jáne quqyq qorǵaý salasyndaǵy fılmderdiń DetectiveFEST HH halyqaralyq festıvalinde tanystyryldy, dep habarlaıdy QazAqparat tilshisi.
Rejısser Sergeı Aleksandrovtyń 26 mınýttyq «Jalǵyz jıhangez» (Odınokıı strannık, Qazaqstan - Reseı) fılmi «Ekologııalyq qylmys» nomınatsııasy - ekologııa salasyndaǵy qylmystarǵa qarsy kúres taqyrybynda júldeger atandy.
Eske sala keteıik, Sergeı Aleksandrov - eki myńynshy jyldardyń basynda Tarazdan Samaraǵa kóship ketip, reseılik tanymal kınodokýmentalıst atanǵan otandasymyz. Ol «Gýbernııa» atty Samara oblystyń telearnasynda «AQ JOL» stýdııasynda teleoperator bolyp eńbek etedi. Birneshe halyqaralyq baıqaýlardyń jeńimpazy atanǵan «Naýryz», «Betashar» atty derekti fılmderdiń avtory.
«DetektıvFEST HH Halyqaralyq kınofestıvali aıaqtaldy! Halyqaralyq kınofestıvalderdiń stsenarıi boıynsha, eń mańyzdy nomınatsııalar men syılyqtar saltanatty sharanyń sońynda tabystalady. Halyqaralyq reglamentter erejesin kınofestıvaldiń prezıdenti ıÝrıı Mıtıýshın buzǵan joq. Festıvaldiń «Jalǵyz jıhangez» atty qazaq-orys fılminiń marapattalýymen aıaqtalǵany tipti qýantady. Kórermenderdiń qoshemetimen kınofestıval prezıdenti fılmniń redaktory Vıacheslav Kýbıtskııge dıplomdy tabys etti» - dedi QazAqparat tilshisine Sergeı Aleksandrov.
23 sáýirde ashylǵan DetectiveFEST halyqaralyq festıvaline álemniń 71 elinen 600-ge jýyq fılm kelip túsken. Festıval eki bólikten: qoǵamnyń eń ózekti máselesin arqaý etken janrlyq nomınatsııa men arnaıy (taqyryptyq) nomınatsııadan turady.
«Ekologııalyq qylmys» nomınatsııasyna segiz kınotýyndy usynylyp, onyń ishinde taǵy bir qazaqstandyq fılm - «Menimen birge tynys al» (Dyshı so mnoı) atty fılmi tanystyrylǵan bolatyn. Sonymen qatar, «Soǵys jáne beıbitshilik» nomınatsııasy boıynsha (áskerı qyzmet pen áskerı borysh týraly» Qazaqstan tarapynan «Terror anatomııasy» (Anatomııa terrora)) usynylsa, al «Qylmystyq tájirıbe» nomınatsııasynda (medıtsına salasyndaǵy qylmyspen kúres) kórermender «Syrqattyń tarıhy» atty taǵy bir qazaqstandyq fılmdi tamashalady.
Sergeı Aleksandrov óziniń «Jalǵyz jıhangez» kınotýyndysynda Jambyl oblystyq «Znamıa trýda» gazetiniń fototilshisi Valerıı Sýtýlov týraly baıandaıdy. Fototilshi tabıǵatqa degen sheksiz mahabbatyn jumysymen dáleldep, «Qazaqstannyń tabıǵaty» atty fotoalbomdy jaryqqa shyǵarǵan. Qustardyń ushyp bara jatqan bir ǵana kadry úshin onyń qamystyń túbinde bir tún boıy otyrǵan kezderi bolǵan eken. Al Jambyl óńiriniń aspanynan ushyp bara jatqan tyrnalardy fotosýretke ilý úshin shól dalany kezgen kezderi de bar.
Valerıı Ivanovıch Jambyl óńiriniń túkpir-túkpirin aralap, ózindeı adamdardy tabıǵatqa ǵashyq ete bilgen jan. Onyń tabıǵatqa degen sheksiz qurmeti - árbir týyndysynda aıqyn kórinedi. 2008 jyly ol 60 jasqa tolýyna alty aı qalǵanda ómirden ótken. Sońyna qaldyrǵan murasy búgin urpaqqa qyzmet etip jatyr.
