Tarazdyq eriktiler avtokranmen balkonǵa kóterilip ardagerlerdi quttyqtady
Tarazdyq eriktiler avtokran arqyly 98 jastaǵy Musahan Berdibaev pen 94 jastaǵy Mútálip Erejepbaevtyń balkondaryna deıin kóterilip, olarǵa gúl shoqtaryn syılady. Jastar soǵys ardagerlerine búgingi beıbit kún úshin alǵystaryn bildirse, qart maıdangerler óz kezeginde taǵylymdy batasyn berdi.
Aıta keteıik, óńirde ardagerlerge qurmet pen rızashylyq bildirý munymen tolastamaıdy.
«Jeńis kúnine oraı oblystaǵy 57 ardagerge mıllıon teńge kóleminde áleýmettik kómek kórsetildi. Tyl eńbekkerleri de nazardan tys qalǵan joq. Soǵys jyldarynda tylda 6 aıdan astam jumys istegen 4247 adam 50 myń teńgeden aldy. Sondaı-aq, ekinshi dúnıejúzilik soǵysqa qatysýshylardyń 350 jesiri men múgedekteriniń áıelderi de osyndaı kólemde áleýmettik kómekke qol jetkizdi. Al, Lenıngrad blokadasynda bolǵandar men kontslagerlerdiń burynǵy tutqyndaryna 60 myń teńgeden tólendi»,-delingen baspasóz qyzmetiniń habarlamasynda.
Sonymen qatar, aımaqtaǵy Ekinshi dúnıejúzilik soǵystyń qatysýshylary men múgedekterine teńestirilgen adamdar 100 myń teńge kóleminde birjolǵy áleýmettik kómek alǵan.
Jalpy, oblys boıynsha barlyǵy 6650 adamǵa bir rettik áleýmettik kómek kórsetý úshin 500 mln. teńgeden astam qarajat qarastyrylǵan.
