Tarazdyq dárigerler turǵynnyń kesilip qalǵan qolyn otamen qaıta jalǵap berdi
TARAZ. QazAqparat – Taraz qalasynyń dárigerleri qala turǵynynyń aramen kesip alyp, bólinip qalǵan qolyn otamen qaıta ornyna tigip berdi, dep habarlaıdy QazAqparat tilshisi.
Jambyl oblysy densaýlyq saqtaý basqarmasynyń málimetine saı, Taraz qalalyq kópbeıindi aýrýhanasynyń jaraqat pýnktine 30 jastaǵy turǵyn qansyrap, aýyr halde kelip túsken. Azamat tsırkýlıar aramen aǵash kesip jatyp, oqystan qoly qurylǵynyń astynda qalyp qoıypty. Saldarynan alaqany ekige bólinip, túsip qalǵan. Qasynda eshkim bolmaǵan soń, biraz ýaqyt esinen tanyp jatyp kóp qan joǵaltsa kerek. Abyroı bolǵanda, sol mańnan ótip bara jatqan tanysy kórip, jedel járdem shaqyrtady. Qalalyq kópbeıindi aýrýhanada oǵan shuǵyl túrde 4 saǵat boıy ota jasalyp, nátıjesinde alaqannyń qalǵan jarty bóligi men saýsaqtary aman qaldy.
Ajaldan aman qalǵan azamattyń dárigerlerge degen rızashylyǵy sheksiz.
«Aǵash kesip jatyp, aranyń tıgenin jáne oń qolymnyń alaqany bólinip túsip qalǵanyn bilemin. Basqasy esimde joq. Ózimdi óldige sanadym. Úmitim úzilgen edi, búginde dárigerlerdiń arqasynda qaıtadan ómirge degen qushtarlyǵym oıandy»,- deıdi naýqas.
«Qazir naýqastyń júıke júıesi qalpyna kelip jatyr. Otanyń nátıjesi jaqsy bolady degen úmitimiz arta bastady. Bári oıdaǵydaı bolsa, aıaq kıiminiń baýyn baılap, qaıta qasyq ustaı alatyn bolady. Ádette, mundaı jaraqat kezinde dene múshesin alyp tastaýdan basqa amal joq. Biraq, naýqastyń ýaqyt ozdyrmaı, bizge jetkizilgeni - úlken septigin tıgizdi. Osyndaı jaraqattardyń kóbi – bolgarka arasyn durys paıdalanbaýdan bolyp jatady. Ol terini jyrtyp ketedi. Sondyqtan, ony ustaǵanda asa abaı bolǵan jón»,- deıdi jaraqat pýnkiniń meńgerýshisi Oleg Shaııýnýsov.
