Tarazdyq danyshpan bala halyqaralyq konkýrsta jeńimpaz atandy
TARAZ. QazAqparat – Tarazda turatyn aıryqsha daryn ıesi Isaak Mýstopýlo Ońtústik Koreıada ótken Global IT Challenge 2019 halyqaralyq konkýrsynyń fınalynda jeńimpaz atandy, dep habarlaıdy QazAqparat tilshisi.
Aıryqsha muqtajdyǵy bar balalarǵa arnalǵan aqparattyq tehnologııalar salasyndaǵy bul dástúrli baıqaý 2011 jyldan beri ótkizilip kele jatyr. IT salasyndaǵy talantty jastardy qoldaýǵa baǵyttalǵan atalǵan halyqaralyq konkýrsqa osy toptaǵy 13-22 jas aralyǵyndaǵy jastar qatysa alady.
Bıyl bul baıqaý Ońtústik Koreıanyń Pýsan qalasynda 26-28 qarasha kúnderi ótken bolatyn. LG kompanııasynyń Pacific Ocean elderine arnalǵan biregeı baıqaýyna bıyl 20 elden 300 úmitker qatysty. Jerlesimiz aqparattyq tehnologııa salasyndaǵy eń úzdik aıtı mamandar ishinen «eLifeMap» atalymynda top jaryp, «Best Award» Bas júldesin jeńip aldy.
Eske sala keteıik, Isaak Mýstopýlo - «Úılesim teorııasy» jobasynyń avtory. Ol Taraz qalasynda týǵan. Týmysynan sal aýrýyna shaldyqsa da, ǵylym-bilim jolynda eshqandaı kedergi bolmaý keregin Hokıngten keıin dáleldegen tulǵa retinde tarıhta qalýy bek múmkin. Isaak Brıtan Keńesi men National Agency for Technological Development uıymdastyrǵan múmkindigi shekteýli jandarǵa arnalaǵan STEM ulttyq ınnovatsııa konkýrsynda «Úılesim teorııasy» atty vıdeorolıgi úshin arnaıy júldege ıe bolǵan. Óz vıdeosynda ol ǵarysh apparattary úshin elektr qýatyn óndirý jolyn sıpattap bergen bolatyn.
15 jasynda ǵarysh kemelerine arnalǵan elektroenergııany óndirý joldaryn paıymdaǵan. Osydan keıin áıgili ulybrıtanııalyq astrofızık, professor Stıven Hokıngpen kezdesken bolatyn.
