Tarazdyq alaıaq áıel messendjer arqyly turǵyndardyń 4,5 mln teńgesin ıemdengen
TARAZ. QazAqparat – Taraz qalasynyń turǵyny messendjer arqyly qazaqstandyqtardyń 4,5 mıllıon teńge aqshasyn ıemdengen, - dep habarlaıdy QazAqparat tilshisi.
Jambyl oblysynyń Polıtsııa departamentine Taraz, Almaty, Qaraǵandy jáne Nur-Sultan qalalarynyń 17 turǵyny júgingen.
Olar óz shaǵymdarynda belgisiz áıeldiń qosymshalardyń birindegi «Baılyq sektory» jáne «777» toptaryna olardy qosqanyn atap kórsetken. Ol salynǵan qarajatty 30 paıyzdan 60 paıyzǵa deıin arttyrýǵa ýáde bergen.
Toptar qarjy pıramıdasy túrinde qurylyp, qatysýshylarǵa dostary men tanystaryn tartqany úshin qosymsha bonýstar berýge ýádelesken. Bul týraly atalǵan departamenttiń baspasóz qyzmeti habarlady.
«Alǵashqyda birneshe adamǵa paıyzben aqsha berilgen, nátıjesinde bul toptar úshin qosymsha jarnama bolǵan. Alaıda, kóp uzamaı senim bildirgen azamattardan jalpy somasy 4,5 mıllıon teńgeden astam qarajat jınap alǵan áıel telefon nómirin ózgertip tastaǵan. Jambyldyq polıtseılerdiń kásibı is-áreketteriniń nátıjesinde alaıaqtyq jasady degen kúdikpen Tarazdyń 50 jastaǵy turǵynyn ustaýǵa múmkindik týdy. Atalǵan derekke qatysty QR QK 190-baby 3-bóligi «Alaıaqtyq» boıynsha sotqa deıingi tergeý bastaldy»,-delingen habarlamada.
Búginde kúdikti óz kinásin moıyndady. Polıtsııa departamentiniń qyzmetkerleri osy áıeldiń alaıaqtyq áreketterinen zardap shekken tulǵalar bolǵan jaǵdaıda habarlasý qajettigin eskertedi.
