Tarazdy jańa jyldyq bezendirýge 19 mıllıon teńgeden astam qarjy jumsalady
Taraz qalasy ákimdiginiń baspasóz qyzmetiniń habarlaýynsha, bıyl oblys ortalyǵynda eki merekelik shyrsha ornatylady.
«Shyrshalardyń biri QR Tuńǵysh Prezıdenti saıabaǵynyń aýmaǵyna, ekinshisi «Kóne Taraz» tarıhı-etnomádenı ortalyǵyna qoıylady. Qazirgi ýaqytta bul aýmaqtarda jańa jyldyq bezendirý jumystary júrgizilip jatyr. Bul maqsattarǵa qala bıýdjetinen 19 mln 150 myń teńge qarastyrylǵan», - dedi qala ákimdigi baspasóz qyzmetiniń jetekshisi Dáýlet Tólendi.
Dástúr boıynsha Jambyl oblysynyń bas shyrshasy qalanyń ortalyq alańynda ornatylsa, 2019 jyldan beri «Kóne Taraz» tarıhı-etnomádenı ortalyq alańyna da jańa jyldyq shyrsha qoıylyp keledi.
«2021 jyl qarsańynda «Kóne Taraz» tarıhı-etnomádenı ortalyǵynyń alańyndaǵy bas shyrsh órtengennen keıin, bıyl oblys ortalyǵyn merekelik bezendirý kezinde ótken jyldan qalǵan dekor elementterin jáne jınalmaly shyrsha qurylymyn paıdalaný týraly sheshim qabyldandy. Bul óte tıimdi sheshim», - dedi spıker.
Vedomstvo demeýshilik qarajat esebinen erekshe qajettiligi bar tarazdyq 2 225 balaǵa arnaıy merekelik syılyq beriletinin, qarjylandyrý kólemi shamamen 5 mıllıon teńgeni quraıtynyn atap ótti.
