Tarazdyń birqatar aýmaǵyndaǵy sý júıesin jańartýǵa 4,2 mlrd teńge qajet
ASTANA. KAZINFORM — Taraz qalasynyń Jibek joly aýdanyndaǵy Jalpaqtóbe eldi mekeninde sý uńǵymasy men ishki jelilerdi jańartý quny shamamen 4,2 mlrd teńgege baǵalandy. Bul týraly aýdan ákimi Qarlyǵash Aralbekova málimdedi.
Qalaǵa qosylǵan aýmaqtar úshin jańa sý qubyrlaryn tartý jáne eski jelilerdi aýystyrý jobalary ázirlendi. Jumystardyń bir bóligine respýblıkalyq bıýdjetten qarjy bólinýi qajet.
Taǵy bir iri joba Shalǵaı Qarasý, Orman, Tekturmas alqaptaryn jáne temirjol ótkelinen arǵy aýmaqty qamtıdy. Onyń quny 4,8 mlrd teńgege baǵalanyp otyr.
«Qant zaýyty» alqabynda 39 shaqyrym sý jelisin shamamen 1,05 mlrd teńgege jańartý josparlanǵan. Áýejaı mańyndaǵy turǵyndar úshin uzyndyǵy 7,7 shaqyrym bolatyn magıstraldyq sý qubyryn tartý jobasy ázirlendi. Onyń quny — 597,7 mln teńge.
Shaǵyn turǵyn alqaptar úshin de jeke jobalar qarastyrylǵan. Qalanyń shyǵys shetindegi Talas alqabynda 274 aýlaǵa sý jetkizý úshin 11,8 shaqyrym qubyr tartý josparlanyp otyr. Bul aýmaqta 1 370 adam turady. Ákimdik málimetinshe, jobanyń quny shamamen 417,7 mln teńge.
Al Dorojnık alqabynda uzyndyǵy 5,5 shaqyrym bolatyn sý qubyry 750 turǵyny bar 150 aýlany sýmen qamtýǵa tıis. Oǵan shamamen 248,8 mln teńge qajet.
Aýdan ákiminiń aıtýynsha, usynylǵan jobalardyń birqatary ázirge respýblıkalyq bıýdjetten qarjy bólinýin kútip otyr.
Eske salaıyq, buǵan deıin Petropavlda keler jyldan bastap asý tarıfi — 38%, al káriz qyzmeti 12% qymbattaýy múmkin ekenin jazǵanbyz.