Tarazdyqtar kún jylynsa sý basý qaýpi tónýi múmkin dep saq otyr

TARAZ. KAZINFORM - Taraz qalasynda qalyń qardan keıin sý tasqynynyń aldyn alý sharalary júrgizildi, dep habarlaıdy QR Tótenshe jaǵdaılar mınıstrliginiń baspasóz qyzmeti.

Baspasóz qyzmetiniń málimetterine qaraǵanda, Taraz qalasynda qalyń qar jaýǵannan keıin sý tasqyny qaýpiniń aldyn alý maqsatynda ınjenerlik-aldyn alý jumystary uıymdastyryldy.

TJM áskerı qyzmetshileri men qutqarýshylary jáne jergilikti atqarýshy organdardyń ókilderi birlesip, qardyń qarqyndy erýinen týyndaıtyn sý basý qaýpin azaıtý sharalaryn júrgizdi.

- Turǵyn sektorda erigen sýdyń aýla aýmaqtaryna kirýine jol bermeý úshin qum toltyrylǵan qapshyqtar tóseldi. Sonymen qatar, aýla aýmaqtary sýdan tazartylyp, erigen qar sýynyń kedergisiz aǵýy úshin aryq júıeleri tazartyldy, - delingen habarlamada.

Júrgizilgen aldyn alý sharalary sý tasqyny qaýpin tómendetýge, turǵyndardyń múlkin qorǵaýǵa jáne kóktemgi kezeńde qalalyq ınfraqurylymnyń turaqty jumysyn qamtamasyz etýge baǵyttalǵan.

Osyǵan deıin Almaty oblysynda 10-nan astam eldi mekenge sý tasqyny qaýpi tónip turǵany týraly jazdyq.