Tarazdyq tártip saqshylary mas júrgizýshini trassa boıymen qýalap, qolǵa túsirdi

TARAZ. KAZINFORM — Jambyl oblysynda polıtseılerden qashqan mas júrgizýshi beınejazbaǵa túsip qaldy. Bul týraly Polisia.kz jazdy. 

Patrýldeý kezinde polıtsııa batalonynyń qyzmetkerleri saǵat 03:10 shamasynda Batys Eýropa — Batys Qytaı respýblıkalyq mańyzy bar avtojolynyń 162-shaqyrymynda júrgizýshi qaýipti manevr jasaǵan Kia K5 kóligin baıqaǵan.

— Polıtseıler kólikti toqtatýǵa tyrysqan, biraq júrgizýshi polıtsııa qyzmetkerleriniń zańdy talabyn elemeı, jyldamdyqty arttyra túsken. Jol qozǵalysynyń basqa qatysýshylaryna qaýip tóndirmeý úshin polıtseıler kólikti qýýǵa májbúr boldy. Taraz qalasynan Almatyǵa bet alǵan 36 jastaǵy júrgizýshi polıtsııadan jasyrynýǵa tyrysyp, patrýldik kólikpen soqtyǵysty. Kóp uzamaı quqyq buzýshy ustalyp, Qordaı aýdandyq polıtsııa bólimine jetkizildi, — delingen habarlamada.

Oǵan qatysty ishki ister organdary qyzmetkeriniń zańdy talabyn oryndamaǵany, apattyq jaǵdaı týǵyzýǵa ákep soqqan jol erejesin buzǵany, mindetti saqtandyrý jasamaǵany, kólik quraldaryn paıdalaný qaǵıdalaryn, manevr jasaý qaǵıdalaryn buzǵany úshin 5 ákimshilik hattama toltyryldy. Jol -kólik oqıǵasy saldarynan zardap shekkender joq. Avtokólik aıyp turaǵyna qoıyldy.

Eske sala keteıik, buǵan deıin Pavlodar polıtseıleri balalaryna 4,5 mln teńge qaryz ákeni ustaǵanyn jazǵan bolatynbyz.