Tarazdyq oqýshy «Táýelsizdik urpaqtary» jobasy aıasynda qalqymaly elektr stansasyn jasap shyǵardy
ASTANA. KAZINFORM – Byltyrǵy «Táýelsizdik urpaqtary» jobasynyń «Aqparattyq tehnologııalar» baǵyty boıynsha grant ıegeri Qanat Tájihan «Future Solar Power Plant» jobasyn júzege asyryp, tanystyrdy. Qanat 18 jasta. Taraz qalasyndaǵy mektepterdiń birinde 12-synypta oqıdy. Bolashaqta IT ınjeneri bolýdy josparlap otyr. Bul týraly Mádenıet jáne aqparat mınıstrliginiń baspasóz qyzmeti málim etti.
«Stýdent grant qarajattyna qýattylyǵy 6,6 kVt bolatyn Qazaqstandaǵy tuńǵysh qalqymaly kún elektr stantsııasyn jasaǵan. Júıe kún trekerimen jáne ózin-ózi tazalaý fýnktsııasymen jabdyqtalǵan», - delingen habarlamada.
Avtordyń aıtýynsha, onyń ónertabysy qazaqstandyq naryqtaǵy eń tıimdisi.
Qanattyń jobasy qazirdiń ózinde Almaty oblysynyń ekologııalyq aımaqtarynyń birinde júzege asyrylýda.
Aıta keterligi, 2024 jyly «Táýelsizdik urpaqtary» baıqaýy aıasynda jastardyń bastamalaryn júzege asyrýǵa 3 mıllıon teńge somasynda 30 grant bólinedi. Volonterlik salasyn qoldaý maqsatynda qosymsha «Volonterlik» baǵyty qarastyrylǵan.
Qazir «Táýelsizdik urpaqtary» baıqaýyna ótinimder qabyldanyp jatyr.
