«Ǵanı áke…»: tarazdyq oqýshy Artem Pogorelovtiń haty mınıstrdi tolqytty

ASTANA. KAZINFORM —  27 mamyr men 2 maýsym aralyǵynda «Qazaqstan balalary» onkúndigi aıasynda «Mınıstrge hat» atty aktsııa ótti. Aktsııa aıasynda 235 hat kelip túsken. Bul týraly Oqý-aǵartý mınıstri Ǵanı Beısembaev áleýmettik jelidegi paraqshasynda aıtty. 

— Ózderińizge belgili, maýsym aıynyń basynda «Mınıstrge hat» aktsııasyn bastaǵan bolatynbyz. Búgingi kúni 235 hat kelip tústi. Elimizdiń túkpir-túkpirinen kelgen hattardyń árqaısyn zeıin qoıyp, asyqpaı, muqııat oqyp shyqtym. Shyndyǵynda ashyq jazylǵan usynys pikirler, júrek jardy tilekter men jas balaǵa tán taza bulaqtaı oıǵa toly hattar meni qatty tolǵandyrdy.

Olar mektebi men súıikti ustazdary, bastarynan ótken qym-qıǵash qyzyqty oqıǵalary, alǵa jetelegen maqsat-murattary týraly jazýlary meni zor áserge bólegeni sonsha balalarmen jeke sóılesip otyrǵandaı áser qaldyrdy. Hattardy oqı otyryp, eń aldymen ata-ana retinde qýanysh, muǵalim retinde balalarymyz úshin maqtanysh sezim boıymdy bıledi, — dedi mınıstr.

Ǵanı Beısembaev bir hatqa erekshe kóńil bólgenin atap ótti. 

— Ásirese myna bir hat erekshe kóńil bóldirdi. Taraz qalasyndaǵy № 66 mekteptiń 7-synyp oqýshysy Artem Pogorelovtiń haty. Artem — taǵdyry jeńil bolmasa da, jigeri muqalmaǵan batyr bala eken. Ol patronattyq otbasynda tárbıelenýde, ári qazaq mektebinde oqıdy. Mektep jańalyqtarynan habar júrgizedi eken. Bolashaqta jýrnalıst bolýdy armandaıdy. Óz hatyn «Ǵanı áke…» dep bastaǵan eken. Ár sózi meıirim men izgilikke toly. Sózderi de, sezimi de shynaıy, júrekke jyly tıdi. Artemniń hatyn birneshe ret qaıtalap oqyp shyqtym.

Aınalaıyn, Artem! Eger osy jazbany oqyp otyrsań, ózińmen Astanada kezdesýdi josparlap otyrmyn. Sol kezdesý óziń aıtqan áke men bala arasyndaǵy áńgimedeı bolady dep senemin, — dedi elimizdiń bas ustazy. 

Mınıstr bul aktsııa jańasha bastama bolǵanyn atap ótti.

— Bul aktsııa biz úshin de jańasha bastama boldy. Olar tek oryndy suraq qoıyp qana qoımaı, jaýabyn tabýǵa umtylǵan. Eń bastysy — bizge ıaǵnı úlkenderge, bolashaqqa senedi. Bul senim — júrekten shyqqan sózdiń, taza káýsár bulaǵy.

Qarapaıym armandardan bastalyp, shynaıy ári maǵynaly dıalogqa aınalǵan aktsııa mindetti túrde jalǵasyn tabýy tıis. Ár balaǵa shyn júrekten alǵys aıtamyn. Hattaǵy ár sóz — biz úshin baǵyt ári baǵdar. Qazirgi ýaqytta hatta kórsetilgen máseleler boıynsha jan-jaqty jumys júrgizilip jatyr. Ótinishterdiń barlyǵy júıelenip, pysyqtalyp jatyr. Keıbirin naqty sheshý úshin aldaǵy ýaqytta talqylaýlar men pikir almasýlar uıymdastyrylady. Ár oı, árbir pikir men usynys nazardan tys qalmaıtyn bolady, — dedi ol.

Aıta ketelik balalar elimizdiń bas ustazyna hat joldaı alatyny týraly jazǵan edik.