Tarazdan Moıynqumǵa áýe tasymaly iske qosylady
TARAZ. QazAqparat – Jambyl oblysynda Taraz-Moıynqum baǵytynda áýe reısi ashylady, - dep habarlaıdy QazAqparat tilshisi.
Oblys ortalyǵy – Taraz qalasy men Moıynqum aýdany arasynda áýe tasymaly iske qosylady.
Bul týraly aımaq basshysy Asqar Myrzahmetov aýdanǵa arnaıy barǵan jumys sapary barysynda turǵyndardyń tilegine kóńil bólip, jaýapty organdarǵa naqty tapsyrmalar bergen bolatyn.
Moıynqum – oblys ortalyǵynan eń shalǵaı aýdandardyń biri. Eki ortadaǵy jol qıyndyǵy qatynap júrgen jolaýshylardyń kópten kóńilinde júrgendigi daýsyz. Bul másele endi ońynan sheshilmek.
«Jambyl oblysy ákimi A.Myrzahmetovtyń tapsyrmasyna sáıkes, oblysymyzdaǵy shaǵyn avıatsııany damytý qarastyrylyp otyr. Búgingi tańda, oblysymyzdyń ortalyǵynan Moıynqum jáne Tóle bı aýyldaryna áýe marshrýttaryn ashý múmkindikterin zerdeleý, sonyń ishinde qajettilikti anyqtaý, áýeaılaq salýǵa ketetin shyǵyn kólemin anyqtaý boıynsha jumystar júrgizilýde»,-deıdi oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekov.
Aıta keteıik, Moıynqum aýylynan oblys ortalyǵyna bir kezderi ıaǵnı, 1966-1990 jyldar aralyǵynda kúndelikti 2 ret AN-2 jáne ıAK-40 ushaqtarymen áýe tasymaly qyzmet kórsetken. Alaıda, Respýblıkamyz táýelsizdigin alǵan jyldary elimizdegi qarjylyq qıyndyqtarǵa baılanysty atalǵan áýe marshrýty jumysyn toqtatqan. Aldaǵy ýaqytta ol qaıta jańdanyp, kóptiń tilegi oryndalmaq. Áýe tasymaly iske qosylǵanda eki aradaǵy avtokólikpen júretin 4-5 saǵattyq jol eki ese qysqaryp, 1-1,5 saǵatta jetýge múmkindik týady dep kútilýde.
