Tarazdaǵy jergilikti polıtsııasy bastyǵynyń orynbasaryna 19,5 mln aıyppul salyndy

TARAZ. QazAqparat - Taraz qalasy №2 sotynda sybaılas jemqorlyq jasady degen kúdikke ilikken eki polıtseıge qatysty qylmystyq is týraly brıfıng ótti, dep habarlaıdy QazAqparat tilshisi.

Onda sýdıa Janna Baıdáýletova Taraz jergilikti polıtsııasy bastyǵynyń orynbasary, polkovnık Jaqsylyq Búıtekov laýazymyn paıdalana otyryp, jol-patrýl qyzmetiniń batalon komandıri, podpolkovnık Baqytjan Joldasbekovtiń astyrtyn kómegimen Taraz qalasynyń polıtseılerinen birneshe ret aqsha bopsalaǵanyn aıtty.

«Alty epızod anyqtaldy. Para retinde bopsalanǵan aqshanyń jalpy somasy 279 myń 500 teńgeni quraıdy. Para mólsheri jeti myń teńgeden 180 myń teńgege deıin bolǵan. Para qalalyq ІІB JPQ jol-patrýl polıtsııasy bataloni qyzmetkerleri - Ashat Qalmahanov pen Qýanysh Aqpanovtan alynǵan. Sot otyrysynda sottalýshylar aıybyn tolyqtaı moıyndap, qatty ókinetinin bildirdi», - deıdi sýdıa.

Janna Baıdáýletovanyń aıtýynsha,  sotqa deıingi tergep-tekserý jáne sot protsesi jedeldetilgen rejimde ótken.

Eske sala ketsek, J. Búıtekov QR QK 366-baby («Para alý») 3-bóliginiń 1, 4-tarmaqtary boıynsha aıypty dep tanylyldy. B. Joldasbekov «Para alý» jáne «qatysý» baptary boıynsha aıypty boldy. Endi olardyń árqaısysy paranyń 70 ese mólsherinde - 19,5 mln teńge aıyppul tóleıdi. Sondaı-aq, ekeýi de memlekettik qyzmette, jergilikti ózin-ózi basqarý organdarynda laýazym ıelený quqyǵynan ómir boıy aıyryldy.

Sot úkimi áli zańdy kúshine engen joq.