Tarazdaǵy jastar teatry «Aısha bıbi» tarıhı tragedııasyn sahnalady

Bul týraly oqý ornynyń aqparattyq-ımıdjdik qyzmeti habarlady.

Qoıylymda Aısha bıbi men Qarahan arasyndaǵy jarqyn da qysqa mahabbat hám súıispenshilik tarıhy baıandalady. Spektakl Aısha bıbi týraly ańyzdyń jelisi negizinde kópshilik nazaryna usynyldy.

Ańyz boıynsha sonaý orta ǵasyrlarda eli men jerin jaýynan qorǵaǵan Qarahan esimdi batyr ómir súrgen. Qarsylasynyń aldynda taısalmaǵan Qarahan batyr jaýynyń qyzyna, ıaǵnı asqan sulýlyǵymen qatar aqyldylyǵymen de elge esimi jaıylǵan Aısha bıbige ǵashyq bolady. Kóp uzamaı qyz ákesiniń bul nekege qarsy bolatynyn bilgen soń súıgenin alyp qashýǵa bel býady. Eki jastyń qol ustasyp qashyp ketkenin bilgen ákesi sarbazdaryna olardy óltirýdi buıyrady.

Qýǵan nókerlerden qashamyz dep ǵashyqtar uzaq jol júredi. Arada biraz ýaqyt ótken soń toqtaýsyz shapqylaı berýden sharshaǵan arý Asa atty ózenniń jaǵasynda aıaldaýdy usynady. Han jarlyǵyn buljytpaı oryndaýdy jón kórgen sarbazdar Qarahan men Aısha bıbini kóre salysymen qyzdyń sáýkelesine eń ýly jylan salyp qoıady. Baqyttyń qushaǵynda júrgen ǵashyqtar muny baıqamaı qalady.

Jyly sýǵa rahattanyp túsip shyǵyp, Aısha bıbi kıine bastaıdy. Aqyrynda sáýkelesin kıe bergen kezde jylan shaǵyp alady. Osy sátte ǵashyǵynyń qolynda mert bolyp bara jatqanyn kórgen Qarahan alaı-dúleı kúıge túsip, myna ómirden baz keshedi. «Bul jalǵanda birge bolý buıyrmasa da, o dúnıede jubymyz jazylmasyn» dep súıgenin jaqyn mańdaǵy moldaǵa alyp barady.

Jas jigittiń Májnúndeı qaıysqanyn kórgen molda ǵashyqtarǵa batasyn berip, nekesin qııady. Beıkúná eki jastyń otbasylyq ómiri nebári birneshe mınýtqa sozylady. Sodan keıin ol jany úzilip bara jatqan Aıshanyń qulaǵyna: «Aısha, sen endi bıbi boldyń!» dep úsh ret aıqaılapty. Ǵashyǵynan aıyrylyp, qaıǵydan qan jutqan Qarahan súıgen jarynyń denesin arýlap jerlep, basyna ásem kúmbez ornatady.

Mamandyqtary kásibı akterlikten alys bolsa da Aqbota Baıǵanı, Ádilet Ábdiqadyr, Tańsholpan Maratqyzy syndy jas ónerpazdar basty rólderdi sheber somdap shyqty. Kórermendi sendirdi. Kózge ystyq jas keltirdi.

- Buǵan deıin oqý ornynda ótetin merekelik is-sharalardaǵy shaǵyn qoıylymdarda oınadyq. Sahnanyń kıesi men uly ónerdiń qudiretine degen sheksiz mahabbatymyz «Jansaraıǵa» alyp keldi. Dana halqymyzda «El ishinde óner bar, ónerdi tapqan sheber bar» degen naqyl sóz bar. Biz úshin qoǵamdyq oı-sananyń sharyqtaý shegi men adamı dúnıetanymnyń jemisi bolyp tabylatyn teatr óneriniń orny bir tóbe. Bolmys-bitimi árqıly keıipkerlerdiń rólin oınaý arqyly máńgilik sezimge toly bekzat ónerdiń qyr-syryn meńgere túsemiz, - deıdi qoıylymda Aısha bıbiniń rólin somdaǵan Aqbota Baıǵanı.

Teatrdyń quramy tórt jyl saıyn ózgerip otyrady. Sońǵy ret «Jansaraıdyń» músheleri ótken jyldyń qyrkúıek aıynda jańartylǵan. Basym bóligi Fılologııa, Óner jáne mádenıet fakýltetteriniń stýdentterinen quralǵan ujym únemi daıyndyq ústinde.

Ashylǵanyna 8 jyldyń júzi bolǵan «Jansaraıdyń» alǵa qoıǵan maqsaty bıik. Jas ónerpazdar Jambyl oblystyq qazaq drama teatrymen tyǵyz baılanys ornatyp, kásibı akterlermen shyǵarmashylyq birlestikte jumys atqarýda.

Óner ujymy osy ýaqytqa deıin Álimbek Orazbekovtiń «Bir túp alma aǵashy», Bolat Uzaqovtyń «Januıa» jáne Israıl Saparbaıdyń «Syǵan serenadasy», «Aýyldan kelgen arý» spektaklderin sahnalaǵan bolatyn.