Tarazdaǵy jarylystan zardap shekkenderge tıisti kómek kórsetilip jatyr
TARAZ. QazAqparat - Taraz qalasynda kópqabatty úıde oryn alǵan jarylystan zardap shekkenderge oblystyq ákimdik tarapynan tıisti kómek kórsetilýde. Tótenshe jaǵdaıdan qaza tapqandar sany 3 adamǵa jetti, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Budan buryn habarlaǵanymyzdaı, búgin tańǵy saǵat 06:21-de Taraz qalasy №9 «Myńbulaq» yqshamaýdanyndaǵy 62-úıde jarylys bolyp, kópqabatty úıdiń bir bóliginiń 1-3 qabattary qulaǵan edi.
«Oqys oqıǵa 2-qabattaǵy 49-shy páterde oryn alǵan. Aldyn ala boljam boıynsha, jarylys gaz jabdyqtaryn abaısyz paıdalanýdan oryn alǵan. Oqıǵaǵa baılanysty qajetti mamandar men tehnıka jumyldyryldy. Úıdiń barlyq turǵyndary tolyǵymen qaýipsiz jerge kóshirildi. 8 adam zardap shegip, 3 turǵyn qaza tapqan» delingen oblys ákimi baspasóz qyzmetiniń habarlamasynda.
Qazirgi kezde oblys ákimdiginiń qoldaýymen zardap shegýshiler barlyq qajetti kómekti alyp otyr. Atap aıtsaq, apat bolǵan úıdiń 100-den astam turǵynyna №47 mektepte ystyq tamaq berilip, psıhologııalyq-medıtsınalyq kómek kórsetilip jatyr. Sondaı-aq, zardap shegýshiler qaladaǵy № 13 «Báıterek» móltekaýdanyndaǵy kópqabatty úıdegi bos páterlerge ýaqytsha jaıǵastyrylýda. Olardyń jaǵdaıy turaqty baqylaýda bolady.
Tótenshe jaǵdaıǵa baılanysty oblys ákiminiń birinshi orynbasary Bekbolat Orynbekovtyń tóraǵalyǵymen oblystyq jedel shtab quryldy. Sondaı-aq, +7- 7262 - 513575 nómiri boıynsha jedel jeli jumys istep tur.
Búginde Taraz qalasynda nysandyq tótenshe jaǵdaı jarııalandy. Jalpy bul baǵytta aldyn ala saqtyq sharalary retinde qala bıýdjetinen 91,5 mıllıon teńge qarastylǵan. Atalǵan oqıǵaǵa baılanysty naqty shyǵyndarǵa taldaý jasalady. Qajet bolǵan jaǵdaıda, oblystyq qazynadan da qarjy bólinbek.
Aıta ketý kerek, osy tótenshe jaǵdaı týraly QR Premer-Mınıstri Asqar Mamın shuǵyl túrde Qazaqstan Prezıdenti Nursultan Nazarbaevqa baıandaǵan bolatyn. Memleket basshysynyń tapsyrmasy boıynsha QR Premer-Mınıstriniń orynbasary J.Qasymbektiń tóraǵalyǵymen úkimet komıssııasy quryldy. Komıssııa músheleri men Astana qalasynda issaparda júrgen oblys ákimi Asqar Myrzahmetov Taraz qalasyna shuǵyl ushyp kelip, oqıǵa ornyna bardy. Bolǵan jaǵdaımen jan-jaqty tanysyp, japa shekkenderdiń hal-jaǵdaıyn bilip, qaza bolǵandardyń jaqyndaryna kóńil aıtty.
