Tarazdaǵy jarylys: marqumdardyń otbasyna 1 mln teńgeden beriledi
TARAZ. QazAqparat - Tarazdaǵy kópqabatty úıdegi jarylysqa qatysty Elbasy tapsyrmasymen arnaıy qurylǵan úkimet komıssııasynyń músheleri Taraz qalasyna shuǵyl ushyp kelip, oqıǵa ornyna bardy, dep habarlaıdy QazAqparat.
QR Premer-Mınıstriniń orynbasary Jeńis Qasymbektiń tóraǵalyǵymen komıssııa otyrysy ótip, oqıǵanyń sebep-saldary jan-jaqty talqylandy. Jeńis Qasymbek oryn alǵan jaǵdaıdy egjeı-tegjeıli zerdeleı kele naqty qorytyndy shyǵarý qajettigin jáne qajet bolsa arnaıy mamandardy basqa qaladan aldyrý kerektigin basa aıtty. Barlyq zardap shekken turǵyndarǵa jeke-jeke habarlasyp, psıhologııalyq jáne medıtsınalyq kómek kórsetip, ýaqytsha ornalasatyn páterlermen qamtamasyz etý kerektigin tapsyrdy. 
Sonymen qatar, oblystyq polıtsııa departamentiniń basshysyna qaýipsiz jerge kóshirilgen turǵyndardyń dúnıe-múlikteri qoldy bolmaýyn tapsyryp, ondaǵy kúzetý jumystaryn kúsheıtý kerektigin aıtty.
Shtab jumysyn ótkizgen komıssııa tıisti memlekettik organdarǵa naqty tapsyrmalar berdi. Sondaı-aq, qaıtys bolǵan turǵyndardyń otbasylaryna qala ákimdigi tarapynan 1 mıllıon teńgeden qarjylaı kómek beriletin boldy.
Komıssııa otyrysynan keıin QR Premer-Mınıstriniń orynbasary Jeńis Qasymbek pen oblys ákimi Asqar Myrzahmetov aýrýhanada jatqan turǵyndardyń jaǵdaıyn bildi.
Eske sala keteıik, búgin tańǵy saǵat 06:21-de Taraz qalasy «Myńbulaq» yqshamaýdanyndaǵy 62-úıde jarylys bolyp, kópqabatty úıdiń bir bóliginiń 1-3 qabattary qulaǵan. 3 adam qaza tapqan. Búginde oblys basshylyǵy tarapynan japa shekkenderge barlyq qajetti kómekter kórsetilýde.
