Tarazdaǵy jármeńkede ónimder naryqtaǵydan 10-15 paıyz arzan baǵaǵa satyldy
TARAZ. QazAqparat – Taraz qalasyndaǵy aýyl sharýashylyǵy ónimderiniń kezekti jármeńkesi ótti. Onda oblystyń birqatar aýdandary sharýalarynyń ónimderi satyldy,- dep habarlaıdy QazAqparat tilshisi.
Atap aıtsaq, «Grand Passage» saýda kesheniniń alańynda Sarysý men Merki, al kommýnaldyq bazarda Qordaı, Talas aýdandary men Taraz qalasynyń aýyl sharýashylyǵy taýar óndirýshileriniń jáne turaqtandyrý qorynyń 90 tonnadan astam ónimderi usynyldy.
Jármeńke barysynda satylymǵa shyǵarylǵan jalpy quny 113,7 mln. teńgeni quraıtyn taýarlardyń ishinde 5,7 tonna et, 0,5 tonna shujyq ónimderi, 1,3 tonna sút ónimderi, 3 myń dana jumyrtqa, 0,4 tonna kondıterlik ónimder men 0,5 tonna makaron ónimderi, 0,2 tonna tuz, 1,3 tonna balyq, 10 tonna qant, 3 tonna un, 1,2 tonna bal jáne 62,8 tonna jemis-jıdek pen kókónis ónimderi bar.
Jármeńkege arnaıy kelgen oblys ákiminiń orynbasary Berik Nyǵmashev sórelerdi aralap kórip, taýarlardyń sapasy men qoıylǵan baǵalardyń turaqtylyǵyn baqylady.
Aıta ketý kerek, bul jolǵy jármeńkede turaqtandyrý qorynyń sórege qoıylǵan taýarlaryna suranys joǵary bolyp, tutynýshylar tipti saǵattap kezekke turdy.
Jalpy shara barysynda taýarlar naryqtaǵydan 10-15 paıyzǵa arzan baǵaǵa satyldy. Atap aıtsaq, ondaǵy bir keli qanttyń baǵasy — 190 teńge, ósimdik maıynyń lıtri – 420 teńge, kúrish – 240 teńge, sút – 160 teńge, jumyrtqa — 23 teńge jáne bólke nan – 55 teńgeden ótkerildi. Sondaı-aq, kartoptyń kelisi – 90 teńge, pııaz – 55 teńgeden saýdalandy.
