Tarazdaǵy zergerlik dúkennen 25 mln teńgeniń buıymdaryn urlap ketti
TARAZ. QazAqparat – Taraz qalasyndaǵy zergerlik dúkennen iri kólemde zergerlik áshekeı buıymdar urlandy, dep habarlaıdy QazAqparat tilshisi.
Qaraqshy dúkenge ǵımarat qabyrǵasyn buzyp kirip, altyn buıymdardyń kóp bóligin alyp ketken. Keltirilgen shyǵyn kólemi 25 000 000 teńgeni quraıdy.
«Atalǵan fakti boıynsha QR QK 188-baby 3-bóligine sáıkes sotqa deıingi tergeý bastaldy. Oqıǵa oryn alǵan aýmaqty tekserý barysynda dúkenge qylmystyq shabýyl jasaý aldyn ala muqııat daıyndyqpen uıymdastyrylǵany belgili boldy. Júrgizilgen jedel-izdestirý is-sharalarynyń nátıjesinde Taraz qalasy PB 1-PB krımınaldyq polıtsııa bólimshesiniń qyzmetkerleri kúdiktini qolǵa túsirgen. Ol Qaraǵandy oblysynyń 49 jastaǵy turǵyny bolyp shyqty», -delingen oblystyq polıtsııa departamenti baspasóz qyzmetiniń habarlamasynda.
Qazirgi ýaqytta ustalǵan azamat ýaqytsha ustaý ızolıatorynda qamaýǵa alyndy. Onyń basqa da qylmystarǵa qatystylyǵyn tekserý úshin jedel-tergeý sharalary júrgizilýde.
