Tarazdaǵy zergerlik dúkennen 25 mln teńgeniń altynyn urlaǵan qaraǵandylyq tergelýde
TARAZ. QazAqparat – Taraz qalasynda zergerlik salonynan 25 mıllıon teńgeniń altynyn urlap ketken kúdikti ustaldy,- dep habarlaıdy QazAqparat tilshisi.
Taraz qalasyndaǵy zergerlik dúkeniniń birine qabyrǵasyn buzyp kirip, 25 000 000 teńge kólemindegi altyn buıymdardyń basym bóligin alyp shyqqan ury qolǵa tústi. Zergerlik dúkenniń ishine buzyp kirý tásilin qoldanǵandyqtan oblys ortalyǵynyń turǵyndary bul qylmysty «ıtalıansha tonaý» dep ataǵan edi.
Júrgizilgen jedel-izdestirý is-sharalarynyń nátıjesinde Taraz qalasy Polıtsııa basqarmasynyń 1-polıtsııa bólimi krımınaldyq polıtsııa bólimshesiniń qyzmetkerleri kúdiktini ustady. Ol Qaraǵandy oblysynyń buryn sotty bolǵan 49 jastaǵy turǵyny bolyp shyqty. Atalǵan derekke qatysty QR QK 188-baby 3-bóligi (urlyq) boıynsha sotqa deıingi tergeý amaldary júrgizilýde. Bul týraly oblystyq polıtsııa departamenti habarlady.
Osyǵan oraı, «Domıno» zergerlik salonynyń dırektory Marına Sedova Taraz qalasy Polıtsııa basqarmasynyń 1-polıtsııa bólimi jedel tobyna zergerlik salondy tonaý deregin ashqany úshin shynaıy rızashylyǵyn bildirgen.
«Jedel toptyń úılesimdi jáne joǵary kásibı jumysynyń nátıjesinde qylmysker ustaldy. Sizderdiń qajyrly eńbegińiz, quzyrettiligińiz, durys sheshim qabyldaý qabiletterińiz barlyq qurmetke laıyq. Saýatty jáne kásibı uıymdastyrylǵan operatsııa úshin Taraz qalasy Polıtsııa basqarmasynyń 1-polıtsııa bólimi basshylyǵyna úlken alǵysymdy bildiremin», - deıdi ol.
