Tarazdaǵy zamanaýı farmatsevtıkalyq keshenniń qurylysy aıaqtalýǵa jaqyn
TARAZ. QazAqparat – Jambyl oblysynyń ákimi Berdibek Saparbaev Taraz qalasyndaǵy saqtaý qoımalarymen qamtylǵan jańa farmatsevtıkalyq óndiris kesheniniń qurylysymen tanysty, - dep habarlaıdy QazAqparat tilshisi.
Jobany «Ámir jáne D» JShS júzege asyrýda. Jalpy aýmaǵy 7 myń sharshy metrdi quraıtyn óndiristik keshenniń quny – 2,2 mlrd. teńge, onyń ishinde 1,2 mlrd. teńgesin ekinshi deńgeıdegi bankterden nesıege alǵan.
Qurylystyń aıaqtalýy 2020 jyldyń úshinshi toqsanyna josparlanyp otyr. Zaýyttyń óndiristik qýaty jylyna shamamen 3,42 mıllıard teńgeni quraıtyn 15 mıllıon jedel synaq, 1,5 mıllıon baqylaý eritindisi jáne zalalsyzdandyrýǵa arnalǵan 50 000 orama bolady. Saqtaý qoımasynda 1 698 tabaqsha orny men 2 130 sóre bar. Zaýyt ımmýnohromatografııalyq taldaý úshin 200-den astam jedel synaqtardy (merez, AITV, V gepatıti, A gepatıti, S gepatıti), dári-dármekterdi, allergııalyq testilerdi jáne taǵy basqa medıtsınalyq buıymdardy ázirleıdi.
Jańa óndiristik keshende 200-den astam jumys orny ashylmaq.
Aımaq basshysy júrgizilip jatqan jumystarǵa joǵary baǵa berip, ımportty almastyrý maqsatynda nysandy erterek iske qosýdyń mańyzdylyǵyn atap ótti. Seriktestik basshysy Qarlyǵash Qaımoldaeva halyqty tıimdi dári-dármektermen jáne preparattarmen qamtamasyz etý úshin júrgizilip jatqan sharalar týraly áńgimeledi.
«Qorlar únemi tolyqtyrylyp otyrady. Dıstrıbıýtorlardyń qoımalarynan tabýǵa bolatyn barlyq zattar dereý satyp alynady. Azıtromıtsın men tseftrıaksondar árqashan satylymda, al dárihanalarda olardyń analogtary áli de bar. Salystyrmaly túrde aıtsam, máselen 2019 jyly kompanııanyń dárihanalar jelisi nebári 54 000 bótelke tseftrıakson satqan bolsa, sońǵy 3 aptada 60 myńnan astam quty 170 teńgeden satyldy.
Bul baǵa lımıtinen 30 paıyz tómen. 50 myń quty mólsherindegi arzan tseftrıaksonnyń legi qoımaǵa kelip jetti jáne múmkindiginshe tez arada dárihanalarǵa jiberiledi. Sonymen qatar, dári-dármek óndirisi jolǵa qoıyldy, oǵan suranys artýda. Áleýmettik mańyzyn eskere otyryp, retsept jáne óndiristik bólim negizinde askorbın qyshqyly, amınofıllın, dıfengıdramın, dıpıron óndirisin bastadyq. Suranys artqan jaǵdaıda táýlik boıy jumys isteıtin bolamyz», – dedi kompanııa dırektory.
