Tarazdaǵy toıda 9 adam ýlanyp, jeteýi aýrýhanada jatyr
TARAZ. QazAqparat –Taraz meıramhanalarynyń birindegi toıdan keıin toǵyz adamnyń ýlaný oqıǵasy tirkeldi, dep habarlaıdy QazAqparat.
Qazirgi tańda jeti adam oblystyq juqpaly aýrýlar aýrýhanasynda em alýda eken. Ol týraly oblys ákimdiginiń densaýlyq saqtaý basqarmasynyń baspasóz qyzmeti habarlady.
«Taraz qalasyndaǵy meıramhanalardyń birinen ýlanǵan jaǵdaıda oblystyq juqpaly aýrýlar aýrýhanasyna medıtsınalyq kómekke toǵyz adam júgindi. Onyń ishinde jeti adam aýrýhanaǵa jatqyzyldy. Al, eki adam medıtsınalyq tekserýden keıin shyǵaryldy», - delingen habarlamada.
Sondaı-aq, qalǵan jeti adamnyń jaǵdaıy da qalypty dep baǵalanýda.
Sonymen qatar, oblystyq densaýlyq saqtaý basqarmasy buqaralyq aqparat quraldarynda paıda bolǵan 30 adamnyń jappaı ýlanýy týraly aqparattyń shyndyqqa saı kelmeıtinin málimdedi.
Qazirgi tańda medıtsınalyq kómekke júgingen toǵyz turǵynnyń ýlanýy múmkin delingen meıramhanaǵa tekserý jumystary josparlanýda.
