Tarazdaǵy ortalyq stadıonǵa Balýan Sholaqtyń esimi berilýi múmkin
TARAZ. QazAqparat – Taraz qalasyndaǵy ortalyq stadıonǵa Balýan Sholaqtyń esimin berý jáne eskertkishin ornatý týraly usynystar boıynsha zerdeleý jumystary júrip jatyr,- dep habarlaıdy QazAqparat tilshisi.
Oblys ákimi Berdibek Saparbaev Taraz qalasyn kezekti ret aralaý barysynda shahardaǵy ortalyq stadıon janyndaǵy skverge arnaıy at basyn burdy. Mundaǵy Abaı men Súleımenov kósheleriniń qıylysynan ortalyq stadıonǵa deıin aparatyn jaıaý júrginshiler alleıasyn keńeıtý qajettigine nazar aýdaryldy. Іstemeı turǵan sýburqaqtarǵa qatysty usynystar qaralmaq. Taraz jurtshylyǵynan ortalyq stadıonǵa aty ańyzǵa aınalǵan balýan, halyq aqyny jáne kompozıtor Balýan Sholaqtyń esimin berý jáne tarıhı tulǵa eskertkishin «Taraz-Arena» sport saraıynyń aldynan oblystyń bas stadıonyna kóshirý týraly usynystar túsken. Qazirgi tańda osy usynystar boıyn zerdeleý jumystary júrgizilýde.
Búginde jambyldyqtardyń 32 paıyzy buqaralyq sportpen shuǵyldanady desek, aǵymdaǵy jyl sońyna deıin bul kórsetkishti 35 paıyzǵa deıin jetkizý kózdelýde.
«Biz atqarýshy organdar jumysynyń tıimdiligin baǵalaýdyń qosymsha ındıkatoryn engizýdi josparlap otyrmyz. Bul sporttyq nysandardyń, onyń ishinde mektep sport zaldarynyń júktelý deńgeıine qatysty», - dedi Berdibek Saparbaev.
Budan soń aımaq basshysy qaladaǵy birqatar bilim oshaqtarynyń qurylystarymen tanysty. Atap aıtsaq, oblys ákimi №4, №16 jáne №2 orta mektepterge baryp, olardyń qurylysynyń jaı-kúıin barlady.
