Tarazdaǵy órt shalǵan turǵyn úıde jóndeý jumystary bastaldy

TARAZ. QazAqparat - Birer kún buryn Taraz qalasy Tóle bı kóshesindegi №4 kópqabatty turǵyn úıden órt shyǵyp, jalyn 54 órt sóndirýshi men 13 tehnıkanyń kómegimen aýyzdyqtalǵanyn jazǵan bolatynbyz. Aýmaǵy 800 sharshy metrdi sharpyǵan órt kópqabatty turǵyn úıdiń shatyrynan shyqqan, dep habarlaıdy QazAqparat tilshisi.

Kópqabatty turǵyn úıde 133 páter bolsa, besinshi qabattaǵy 20 shaqty páterge zaqym kelgen.

«Janyp jatqanda biz bárimiz bala-shaǵamyzben uıyqtap jatqanbyz. Órt sóndirýshi jigitter tańǵy 4.30-dar shamasynda esigimizdi qaǵyp oıatty. Biz sezgen joqpyz. Sol órt sóndirýshilerdiń arqasynda bárimiz aman qaldyq. Tańǵy 8-ge deıin úıge kire almaı, dalada júrdik», – deıdi zardap shegýshi Gúlden Koıchýbaeva.

Osy oraıda, qala ákimdigi tarapynan turǵyn úıdi jóndeý jumystary, turǵyndarǵa kórsetiler ózge de kómekter týrasynda Taraz qalasy ákiminiń orynbasary Qaırat Ismaıldan surap bilgen edik.

«Qazirgi tańda órt shalǵan turǵyn úıge «Taraz Invest Azia» jaýapkershiligi shekteýli seriktestigi jóndeý jumystaryn bastap ketti. Tıisti quzyretti organdar ol jerde zerdeleý jumystaryn júrgizip, zerttep, órttiń neden shyqqanyn anyqtaýda. Shyǵyn kólemi shamamen 40-50 mıllıon teńge. Barynsha qysqa merzimde shatyryn jóndep, búlingen páterlerdi qalpyna keltirip berýge kúsh salamyz.

Turǵyndardyń birazy óz úılerine qaıta baryp, páterine jóndeý júretin keıbiri týystarynyń úıin panalaýda. 20 páterdiń turǵyndarynyń ishinde kóp balaly analarǵa shıpajaıdan, ońaltý ortalyqtarynan joldamalar usynyldy», – dedi qala ákiminiń orynbasary.

Aıta keteıik, buǵan deıin Tarazda kópqabatty úı órtenip, turǵyndar mektepke ornalastyryldy dep habarlaǵan bolatynbyz.