Tarazdaǵy oqý ornynda Pedagogıkalyq sheberlik ortalyǵy ashyldy
ASTANA. QazAqparat Taraz memlekettik pedagogıkalyq ınstıtýtynda Pedagogıkalyq sheberlik ortalyǵy ashyldy, dep habarlaıdy QazAqparat TarMPI-dyń Aqparattyq-ımıdjdik qyzmetine silteme jasap.
Munda mektep oqýshylary men bolashaq pedagogtarǵa ınnovatsııalyq tehnologııalardy zerdeleýge arnalǵan sabaqtar men ǵylymı-zertteý jumystary júrgiziledi.
Instıtýt rektory Darııa Qojamjarova osy taqilettes ortalyq aımaqtaǵy joǵary oqý oryndarynyń ishinde tuńǵysh ret TarMPI-da ashylyp otyrǵanyn aıtty.
«Pedagog óz pánin tereń meńgergen, ǵylym men ónerdiń tıisti salalarynan habardar, oqytý men tárbıeniń ádistemesin jetik ıgergen maman bolýy kerek. XXI ǵasyr - qatań báseke ǵasyry. Búginde álemdik básekelestiktiń jyldam damýyna ilese alatyndaı bilimdi de tapqyr dara tulǵanyń taǵdyry bizdiń jańashyl ustazdardyń qolyna tapsyrylyp otyr. Bilikti ustaz daıyndaý memleket damýyn qamtamasyz etetin negizgi resýrs ekendigin basa aıtqym keledi. Sheber pedagog bilimdi, tájirıbesi mol, jan-jaqty bola otyryp, oqýshylardy jeke tulǵa etip qalyptastyrý maqsatynda bilim men tárbıeni ushtastyra alýy qajet. Ortalyq osy mindetterdi negizge ala otyryp qyzmet etedi», dedi Darııa Qojamjarova.
Munda ǵylymı-zertteý jumystary, oqý-ádistemelik jumystary jáne tájirıbe-eksperımenttik jumystary baǵyttary boıynsha jumys atqarylmaq. Pedagogıkalyq sheberlik ortalyǵy Jalpy pedagogıka jáne psıhologııa kafedrasynyń uıytqy bolýymen ashylyp otyr.
«Maqsatymyz Nazarbaev Zııatkerlik mektepteriniń bilim berý sapasy deńgeıin kóterýdegi ozyq ınnovatsııalyq tájirıbelerin úırený jáne nasıhattaý arqyly Jambyl oblysyndaǵy jalpy orta bilim beretin mektepterdiń oqýshylary men ınstıtýt stýdentteriniń fýnktsıonaldy saýattylyǵyn arttyrý. Sonymen qatar, 12 jyldyq bilim berý júıesine endirý boıynsha sońǵy tehnologııalardy tıimdi paıdalanýdy qarastyratyn ádistemelik kómekshi quraldar daıyndaý, pedagogıkalyq semınar, dóńgelek ústelder, ádistemelik trenıngter uıymdastyrý da kózdelip otyr», dep atap ótti Jalpy pedagogıka jáne psıhologııa kafedrasynyń meńgerýshisi Klara Buzaýbaqova.
