Tarazdaǵy oqıǵadan soń Almaty bıligi mektepterdegi ájethana máselesin qolǵa aldy
ALMATY. QazAqparat - Almaty qalalyq Bilim berý basqarmasynyń basshysy Gúlnar Qojabergenova brıfıng barysynda qala mektepterindegi ájethana máselesin tilge tıek etti, dep habarlaıdy QazAqparat tilshisi.
«Tarazda ókinishti jaǵdaı boldy. Almaty qalasynda 3 mekteptiń ájethanalary syrtta ornalasqan. Qalaǵa Naýryzbaı, Alataý aýdandarynyń terrıtorııalary qosylǵanda kóptegen mektepterde osyndaı ahýal boldy. Qazir jaǵdaıdy túzedik, kóptegen mekteptiń sanıtarlyq torabyn ǵımarattyń ishine kirgizdik. Tospa sý ketetin shuńqyrlar qazyldy. Qazir Rahat Mádenıet aýylynda ornalasqan bir mektepte bul áli óz sheshimin tapqan joq. 5 jyl boıy jańa mektep salý máselesin kóterip kelemiz. Ol kezde mekteptiń syrttaǵy ájethanasynyń ózi syn kótermeıtin jaǵdaıda bolatyn. Kelesi jyly Almatyda 8 jańa mektep salynatyn bolsa, onyń biri osy aýdanda boı kóteredi. Ekinshi mektep Shapaǵat shaǵyn aýdanynda ornalasqan. Bul mektep te 1958 jyly salynǵan bolatyn. Sanıtarlyq torapty ishke engizý úshin qajetti ınfraqurylym bolmady. «Tomırıs» shaǵyn aýdanyndaǵy №156 mektepke de osyndaı ózgerister kerek», - dedi Gúlnar Qojabergenova.
Onyń aıtýynsha, mektepterdegi ájethana máselesi 1-1,5 jylda óz sheshimin tabatyn bolady.
Aıta ketý kerek, Tarazda 12 jastaǵy oqýshy qyzdy 38 jastaǵy erkek mekteptiń syrttaǵy ájethanasynda zorlaǵany týraly jazǵan bolatynbyz.
