Tarazdaǵy «magnıt» balanyń búgingi jaǵdaıy qandaı

Tarazdaǵy 3-synyp oqýshysy Nurdáýlettiń «magnıt» bala atanyp ketkenine kóp bolǵan joq. Osydan eki-úsh jyl buryn ereksheligimen eldi eleń etkizgen Nurdáýlettiń boıyndaǵy qasıeti kún ótken saıyn artpasa, kemimegen. Bizge ol týraly anasy aıtyp berdi.

Alty jasar nemeresiniń  boıynda tartylys kúshi bar ekenin birinshi bolyp atasy Arystanbek baıqaǵan. Sodan úıindegi jaqyndary balany ortaǵa alyp, Nurdáýlettiń ústine qasyq, shanyshqy sekildi ózge de maıda temir zattardy jabystyryp kórgen. Olar alǵashynda ózderi de senbegenimen, qaıran qalǵandaryn jasyrmaıdy. Dárigerlerge san márte kórsetkenimen, ón boıynan eshqandaı kemshilik nemese syrqat tabylǵan joq. Olar tylsym qasıet bala densaýlyǵyna esh zardabyn tıgizbeıtinin aıtqan. 

Búginde ol Tarazdaǵy №29 mektepte 3-synypta oqıdy. Sabaq úlgerimi óte jaqsy.

«Nurdáýlet - oqý ozaty. Ustazdary tártibiniń de úlgili ekenin aıtyp maqtaıdy. Magnıttik qabileti artyp kele jatqan sııaqty. Alǵashynda denesine jeńil zattar jabyssa, qazir aýyr zattar da jabysatyn boldy. Densaýlyǵynda eshqandaı kinárat joq. Degenmen, keı kezderi ystyǵy qatty kóterilip, 2-3 kún túspeı turyp alady. Ondaıda boıyndaǵy tartylys kúshi de kúsheıe túsedi. Qazir boıyndaǵy energııasyn shyǵarý úshin fýtbolǵa qatysyp júr. Dop tebýge degen yntasy joǵary»,- deıdi anasy Aıda Ońtalapqyzy. 

Ákesi Nurlybek Qaraqulov balasynyń tabıǵatynan zerek, alǵyr ekenin, mineziniń óte tuıyq, kópshilikpen kóp ashylyp sóılese bermeıtinin aıtady. Qazir denesine qasyqtan bólek uıaly telefon, planshet, útik sekildi salmaqty zattar da jabysady eken. Erekshe bala respýblıkalyq telearnadaǵy baǵdarlamalarǵa da arnaıy shaqyrtylyp, kórermen tańdanysyn týǵyzǵan.

Nurdáýlettiń ata-anasy Aıda men Nurlybek perzentteriniń erteńine ishteı alańdaýly ekenin jasyrmaıdy. Bul qasıet qashanǵa deıin jalǵasatynyn eshkim bilmeıdi. Sondyqtan ýaqyt óte densaýlyǵyna keri áser ete me dep te ýaıymdaıdy. Tabıǵattyń ǵajaıyby boıyna daryǵan Nurdáýlettiń bala armany - fýtbolshy ataný.

Avtor: Ǵıbrat Sembaı