Tarazdaǵy kópqabatty úıdegi jarylystyń naqty sebebi anyqtaldy
TARAZ. QazAqparat - Tarazdaǵy kópqabatty turǵyn úıdegi qoparylysqa gaz sebepshi bolǵan. Keshendi-komıssııalyq jáne órt-tehnıkalyq saraptamalarynyń qorytyndysy osyny kórsetti. dep habarlaıdy QazAqparat tilshisi.
Jergilikti bıliktiń habarlaýynsha, osy apat kezinde zardap shekken turǵyndardyń páterleri qaıta jóndelip, 15 qazanǵa deıin ıelerine tapsyrylady. Apattyń sebep-saldaryn anyqtaý úshin óńirde arnaıy komıssııa quryldy. Zertteý jumystarynyń nátıjesi boıynsha jarylys jabyq keńistikte gaz aýa qospasynyń paıda bolýynan bolǵanyn kórsetti.
«Tótenshe jaǵdaılar sebepterin anyqtaý úshin oblystyq komıssııa qurylyp, úsh otyrys ótkizildi. Keshendik ekspertızanyń materıaldary boıynsha jarylystyń basty sebebi tabıǵı gazdyń aqaýynan bolyp otyr», - deıdi oblystyq TJD basshysynyń orynbasary Talǵat Sabyrov.
Zertteý júrgizgen mekemeniń qorytyndysyna sáıkes, 62 páter qaıta qalpyna keltirýge jaramdy dep tanylǵan. Qalalyq turǵyn úı ınspektsııasy qujattardy daıyndap jatyr. Joba boıynsha páterler esh ózgerissiz, sharshy alańyna sáıkes qaıta jóndeledi.
«45 kúnniń ishinde qorytyndy beriledi. Memlekettik saraptamadan ótedi, sodan keıin jumys bastalatyn bolady. 15 qazanǵa deıin aıaqtaý josparlanyp otyr. Jarylys kezinde esik-terezeleri synǵan kórshi kireberistegi páterler men qarama qarsy 59 turǵyn úıdegi kireberister 2,5 mln teńgege jóndeldi», - qalalyq Turǵyn úı ınspektsııasy bóliminiń basshysy Ǵazız Eralıev.
Zardap shekken 21 otbasy Báıterek shaǵyn aýdanyndaǵy 26 kópqabatty turǵyn úıge ýaqytsha ornalastyryldy. Olardyń kommýnaldyq tólemderin jergilikti bılik óz moınyna alǵan.
Eske sala keteıik, aǵymdaǵy jyldyń 27 aqpan kúni Tarazdyń 9-shaǵyn aýdanyndaǵy kópqabatty úıde joıqyn jarylys bolyp, 4 adam kóz jumdy. Elbasynyń tapsyrmasymen tótenshe jaǵdaıdy tergeýge qatysty úkimettik komıssııa qurylǵan bolatyn.
