Tarazdaǵy qoǵamdyq kólikterdi elektrondy bılettendirýdiń alǵashqy nátıjeleri belgili boldy
TARAZ. QazAqparat – Ótken jyldyń qazan aıynda Taraz qalasynda qoǵamdyq kólikterde elektrondy bılettendirý engizilgen edi. Oblys ákimi Berdibek Saparbaev jańashyldyqtyń alǵashqy nátıjelerin alty aı ótkennen keıin ǵana baǵalaýǵa bolatynyn aıtqan edi, - dep habarlaıdy QazAqparat tilshisi
Osyǵan oraı, elektrondy bılettendirýdiń aralyq qorytyndylaryna júrgizilgen taldaý jasalǵan qadamnyń durystyǵyn kórsetken. Degenmen, jedel sheshýdi qajet etetin ózekti máseleler de joq emes bolyp shyqty. Bul týraly óńir basshysynyń tóraǵalyǵymen ótken keńeste jan-jaqty saralanyp, aıtyldy.
Jolaýshylar kóligi jáne avtomobıl joldary basqarmasynyń basshysy Baqytjan Jánibekovtyń aıtýynsha, 205 myń birlik TulparCard kartasy shyǵarylǵan. Onyń 171,2 myńy qoldanysta, 33,8 myńy rezervte desek, qosymsha taǵy 10 myń kartochka daıyndaýǵa ótinim berilgen. Tarazdyqtar jol júrý aqysyn TulparCard kartasymen, QR-kod jáne avtobýstyń tsıfrlyq kody arqyly tóleý múmkindikterdi oń baǵalaýda. Qazirgi tańda SMS jáne USSD-kod arqyly tóleý sekildi júıelerdi de qosý boıynsha jumystar júrgizilip jatyr. Sondaı-aq, TulparCard kartasynyń teńgerimin toltyrýdyń túrli qyzmetteri qarastyrylǵan. Oblys ortalyǵynyń turǵyndaryna yńǵaıly bolý úshin TulparCard jáne tarazbus mobıldi qosymshalary biriktirilýde, bul naqty ýaqyt rejıminde qalalyq avtobýstardyń qozǵalys kestesin qadaǵalaýǵa múmkindik beredi.
Berdibek Saparbaev oqýshylarǵa arnalǵan qosymshalardyń fýnktsııalaryn keńeıtý boıynsha jumystardyń álsizdigin atap ótti. Mundaı tájirıbe qazirdiń ózinde elimizdiń keıbir qalalarynda qoldanysta desek, onda bir karta arqyly oqýshy mektepke kirerde arnaıy týrnıketten ótý, ashanada tamaqtaný jáne qoǵamdyq kólikterde júrý aqysyn tóleı alady. Bul balanyń barlyq qozǵalystaryn naqty ýaqyt rejıminde baqylaýyna múmkindik beretin ata-analar úshin de yńǵaıly.
Qalaı bolǵanda da, halyq qolma-qol aqshasyz tólem túrin belsendi ıgerýde. Mysaly, qolma-qol tólemderdiń úlesi 13,7-den 0,5 paıyzǵa deıin tómendegen, al mektep kartochkalarynyń qoldaný úlesi 3,5-ten 12,2 paıyzǵa deıin artqan. Jolaýshylardyń 8,2 paıyzy QR-kod arqyly tólem jasaýdy jón kóredi. Nátıjesinde elektrondyq bıletti engizý qarqyny men tıimdiligi boıynsha Taraz búginde Qazaqstan qalalarynyń alǵashqy úshtigine kiredi. Bul rette aıta ketý kerek, Nur-Sultan men Almatyda osyndaı júıe besinshi jyldan beri jumys istep keledi.
Salyq túsimderi úsh eseden astam ósti desek, bul elektrondy bılettiń mańyzdy artyqshylyqtarynyń biri bolyp tabylady.
Qazirgi tańda 32 marshrýt boıynsha 242 avtobýs qatynaýda. Alaıda kólik jetispeýshiligi týyndaýda, al tórtinshi toqsanda kóptegen oqýshylar dástúrli formatta oqı bastaǵanyn eskersek, tapshylyq ózektiligi arta túsýde. Sondyqtan jańa avtobýstar satyp alý jáne jalpy tasymaldaýshylardyń kólik parkin jańartý máselesi aıqyn sezilip otyr.
Oblys ákimdigi qazaqstandyq óndirýshilerden qosymsha 100 avtobýs satyp alý jaıyn qarastyrýda.
Berdibek Saparbaev marshrýttardy usyný boıynsha konkýrstarǵa qatysý sharttaryn qatańdatý qajet dep sanaıdy.
«Qalanyń basty kóshelerinde kólik qozǵalysynyń kestesi kórsetilgen aqparattyq taqtaıshalarmen jabdyqtalǵan zamanaýı aıaldamalar bolýy tıis. Avtopark qyzmetkerlerin adamdarmen sóılesýge, sabyrly jáne sypaıy bolýǵa úıretý kerek. Kólik kompanııalarynyń aǵymdaǵy jaı-kúıi men áleýetine, olardyń jolaýshylar tasymaly naryǵynda jumys isteý qabiletine taldaý júrgizý mańyzdy. Tarazǵa 10 avtotasymaldaýshy qajet emes, olardyń keıbireýleri qarjylyq jaǵynan dármensiz jáne sapaly qyzmet kórsete almaıdy. Sondyqtan memlekettik konkýrstarǵa qatysýshylar úshin jaǵdaıdy qatańdatý sharalaryn jalǵastyrý qajet. Tenderlerdiń jeńimpazdary qyzmet kórsetýdiń joǵary deńgeıin qamtamasyz ete alatyn kompanııalar bolýy kerek. Elektrondy bılettendirý óziniń tıimdiligin dáleldedi. Biz turalap qalmaı, turǵyndarǵa barynsha qolaıly jaǵdaı jasaý maqsatynda bul jumystardy odan ári damytýymyz kerek», - dep túıindedi Berdibek Saparbaev.
