Tarazdaǵy klýbtardy ózderiniń «kúzet qyzmetin» paıdalanýǵa májbúrlegen qylmystyq top ustaldy

TARAZ. QazAqparat - ІІM uıymdasqan qylmysqa qarsy kúres departamentiniń qyzmetkerleri Jambyl oblysy PD jedel qyzmetkerlerimen birlesip, Taraz qalasynda qylmystyq toptyń áreketin toqtatýǵa baǵyttalǵan arnaıy operatsııa júrgizdi, dep habarlaıdy QazAqparat Polisia.kz-ke silteme jasap.

Bul operatsııaǵa «Búrkit» arnaıy maqsattaǵy bólimshesiniń sarbazdary da tartyldy.

Qalanyń barlarynda, kafelerinde jáne túngi klýbtarynda buzaqylyq áreketter jasap, birneshe ret tóbeles, janjal shyǵarǵan top vedomstvonyń jedel qyzmetkerleriniń nazaryna kópten ilikken bolatyn. Jedel tekserý barysynda qala men oblys aýdandarynyń sportshylary men buzaqy jastary qatarynan osy topqa qatysýshylar anyqtaldy. Olar birqatar oıyn-saýyq mekemelerine kúzet qyzmeti túrinde qylmystyq qorǵaýshylyq uıymdastyrǵan. Bul toptyń ishinde buryn buzaqylyq jáne bopsalaý jasaǵany úshin sottalǵandar da bar.

Sonymen qatar bul toptyń atys qarýy qoldanylǵan qylmystyq qaqtyǵystarǵa qatysqany da anyqtaldy. Oıyn-saýyq ortalyqtarynyń basshylary qylmystyq toptyń «kúzet qyzmetin» paıdalanýy úshin olar klýbtar men kafelerdiń klıentteri men qyzmetkerlerine tıisip, qaqtyǵystar, tóbelester jáne janjaldar uıymdastyrǵan.

Polıtsııaǵa qylmystyq toptyń 11 qatysýshysy jetkizildi. Olardyń turǵylyqty jeri boıynsha júrgizilgen tintý is-sharalary barysynda atys, travmatıkalyq qarýlar, sýyq qarý men basqa da zattaı dáleldemeler tárkilendi. Basty kúdiktiler, atap aıtqanda qylmystyq toptyń uıymdastyrýshylary men jetekshileri ýaqytsha ustaý ızolıatoryna qamaldy.

Tergeý jalǵasýda.