Tarazdaǵy karantın: 7 blokposttyń barlyǵy beınebaqylaýmen qamtylǵan
Taraz qalasynyń ákimi Aıtqazy Qarabalaev keshe túnde atalǵan barlyq blokpostty aralap, jumysymen tanysty.
«Taraz qalasynyń Bas memlekettik sanıtar dárigeriniń qaýlysymen 7 sáýir kúni saǵat 00.00-den bastap qala aýmaǵynda karantın rejımi engiziledi. Osyǵan baılanysty qalalyq ákimdiktiń janynan jedel shtab quryldy. Shtab quramyna qalanyń barlyq bólimderi, polıtsııa, SES mamandary engizilgen. Jedel shtab táýlik boıy jumys isteıdi jáne arnaıy jedel telefondary ornatylǵan. Onda tıisti sala mamandary kez-kelgen suraqatarǵa jaýap beredi», - deıdi qala ákiminiń keńesshisi Nuraddın Raqaı.
Shahar basshysy blok-beketterdi aralaý barysynda olardyń vıdeobaqylaýmen, qajetti materıaldarmen (tefal, dıspenser, antıseptıkalyq zattar, stol, oryndyq) kompıýtermen, oryndyqtar, dezınfektsııalyq suıyqtyq quıylǵan bóshkelermen, elektrli generatormen qamtamasyz etilgenine kóz jetkizdi.
Aıta keteıik, beketterdegi vıdeobaqylaý oblystyq, qalalyq shtabpen úılestirilgen. Onda 2 medbıke, 7 áskerı qyzmetker, 3 jergilikti polıtsııa, 2 ákimdik qyzmetkerlerinen táýlik boıǵy kezekshilik uıymdastyrylǵan.
Buǵan deıin Taraz qalasy karantınge jabylatynyn habarlaǵan bolatynbyz. Karantın kezinde qalaǵa kirip-shyǵý, turǵyndardyń júrip-turýyna shekteý qoıyldy.