Tarazdaǵy «Qarahan» jáne «Tekturmas» etnotarıhı keshenderi jańǵyrtylyp jatyr
Atalǵan nysandar elimizdiń túkpir-túkpirinen keletin týrıster úshin de, taǵzym etshiler úshin de tartymdy oryn sanalady. Aldaǵy ýaqytta tıisti ınfraqurylym tartylyp, qaıta jańǵyrtý sharalary atqarylǵannan soń olar «Aısha bıbi» kesenesi men «Kóne Taraz» keshenimen qatar týrızmdi damytýdyń lokomotıvine aınala túsedi dep kútilýde. Bul týraly aımaq basshysy Berdibek Saparbaev ta tilge tıek etti.
«Tekturmastaǵy jumystardy eki kezeńge bólý kerek, aldymen abattandyrý jumystaryn aıaqtap, sodan keıin bekinistiń qurylysyn bastaǵan durys. «Qarahan« jáne «Tekturmas« keshenderine týrıstik marshrýttardy uıymdastyrý, gıdter men ekskýrsovodtardy oqytý qajet. Týrızm basqarmasy týrızmdi damytýdyń strategııalyq josparyn ázirleýi qajet. Jambyl oblysy barsha Qazaqstan men shetelge barynsha jarnamalap, marqaıa kórsetýge turarlyq tarıhı nysandarǵa baı», - dedi oblys ákimi Berdibek Saparbaev.
Búginde «Qarahan» kesenisi aýmaǵynda abattandyrý jumystary júrgizilip jatyr. Qazirgi ýaqytta «Qarahan» jáne «Kóne Taraz» keshenderin qosatyn jaıaý júrginshiler aımaǵyn qamtıtyn skver salý jobasy iske asyrylýda. Qala ákimdigi memlekettik qajettilikter úshin ondaǵy bes jeke úıdi satyp alý máselesin qarastyrýda.
Aımaq basshysy kógaldar men gúlzarlar otyrǵyzyp, Baızaq batyr kóshesi jaǵynan Qarahan kesenesiniń panoramalyq kórinisin asha túsýdi, ol jaqtan da jeke kireberis salýdy usyndy.
Sondaı-aq, oblys ákimi barǵan ekinshi nysan – «Tekturmas» etno-tarıhı kesheni ótken jyly qaıta jandanyp, onda Áýlıeataǵa alyp eskertkish qoıylyp, basqa da sáýlettik elementter ornatylǵan bolatyn. Alaıda, jobany tolyq aıaqtaý úshin ol jerge ortaǵasyrlyq bekinis turǵyzyp, sarqyrama, jaǵalaýdy abattandyrý, keshen men keseneniń arasyna alleıa salý, Ańyraqaı jáne Atlah shaıqastary beınelengen barelefti qabyrǵa ornatý júrgizilýi kerek. Al aspaly jol salý máselesi keshen tolyǵymen aıaqtalǵannan soń qaralmaq.
