Tarazdaǵy kanaldardyń jaǵasyna demalys aımaqtary salynady
TARAZ. QazAqparat – Jambyl oblysynyń ákimi Berdibek Saparbaev Taraz qalasyndaǵy ırrıgatsııalyq júıeleriniń kóktemge daıyndyq máseleleri boıynsha keńes ótkizip, onda birqatar jaıttar saralandy, dep habarlaıdy QazAqparat tilshisi.
«Ótken jyly oblys ortalyǵynyń ırrıgatsııa máselelerimen aınalysatyn arnaıy jumys toby qurylǵan bolatyn. Men bul júıelerdi damytý jóninde birqatar tapsyrmalar júktegenmin. Eki aptadan keıin kóktem keledi, aýa-raıy erte jylynady dep kútilýde. Sondyqtan Taraz qalasynyń kanaldary men aryqtary da múmkindiginshe erte bastan daıyn bolýy tıis», - dedi basqosýdyń basynda sóz alǵan aımaq basshysy.
Taraz qalasynyń ırrıgatsııalyq júıelerin damytýdaǵy sharalar týraly oblys ákiminiń orynbasary Berik Nyǵmashev baıandady. Onyń aıtýynsha, oblys ortalyǵynda uzyndyǵy 82,5 shaqyrym bolatyn segiz kanal bar. Al ırrıgatsııalyq aryqtardyń jalpy uzyndyǵy 164 shaqyrymdy quraıdy. Onyń ishinde 122,3 shaqyrymy lotoksyz aryqtar desek, olardyń 63,6 shaqyrymy jóndeýdi qajet etedi. Sondaı-aq, lotokpen qamtylǵan 41,7 shaqyrym aryqtardyń 20,4 shaqyrymy da jóndeýge jatady. Aǵymdaǵy jyly 50 shaqyrym lotok jelisin ornatý jáne jóndeý josparlanýda, al 2022 jyly 30 shaqyrym lotok jelisi aýystyrylatyn bolady.
«Ótken jyly qalalyq ırrıgatsııalyq júıelerdi tazalaýǵa jergilikti bıýdjetten 150 mıllıon teńge bólingen. Jumystarmen «Taraz-Irrıgatsııa» JShS aınalysqan bolatyn. Bıyl bul maqsatqa 90 mıllıon teńge qajet. Qarajattyń negizgi bóligi, ıaǵnı 80 mıllıon teńge «Úshbulaq» kanalyn mehanıkalyq tazalaýǵa jumsalady», - dedi B.Nyǵmashev.
Kanaldardyń ústindegi zańsyz qurylystar ózekti máselege aınalyp otyr. Olardy kanaldar ótetin aýmaqtardyń ıeleri sanalatyn kásipkerler salǵan.
«Mundaı jerler qoqys jınalý kózine aınalýda. Ótken jyly olardyń ıelerine zańsyz nysandardy buzý týraly 360 habarlama jiberildi. Eger aldaǵy úsh aıda bul talap oryndalmasa, másele sot arqyly sheshiletin bolady», - dedi B.Nyǵmashev.
Kanaldardyń ózin abattandyrý josparlanýda. Olardyń boıynda demalys aımaqtary salynatyn bolady. Sáýlet jáne qala qurylysy basqarmasymen birge bolashaq nysandardyń eskızderi daıyndalypty. Máselen, Qarasý-2 kanalynda salynatyn demalys aımaǵynyń aýdany 16,5 myń sharshy shaqyrymdy quraıdy,
al Úshbulaq kanalyndaǵy 29,5 myń sharshy shaqyrym jer abattandyrylatyn bolady.
Jıyndy qorytyndylaı kele, oblys ákimi kóktemge daıyndyq úshin óte az ýaqyt
qalǵanyn taǵy da atap ótti. Óńir basshysy jumys tobyna aıdyń sońyna deıin kanaldar men aryqtardyń jaı-kúıi týraly esep berýdi tapsyrdy.
-«Jańa maýsymǵa qansha shaqyrym ırrıgatsııalyq júıe daıyn ekenin, qanshasy
jóndeýdi qajet etetinin esepteńizder. Sý kelgen kezde ótken jyly jóndelgen aryqtardyń jumysyn tekserý kerek. Sondaı-aq, qys mezgilinen keıin barlyq arnalardy tazalap, senbilikter ótkizý qajet. Bul baǵytta ásirese jastarmen jumys isteý mańyzdy», - dedi B.Saparbaev.
Sondaı-aq, oblys ákimi jeke kásiporyndarǵa baqylaýdy kúsheıtýdi tapsyrdy.
Olardyń kesirinen qalanyń ırrıgatsııalyq júıeleriniń jumysynda kedergi týyndap otyr.
«Bul jumystarǵa Taraz qalasynyń ákimi Aıtqazy Qarabalaev belsendi qatysýy tıis. Eger jóndelgen lotoktarda aqaýlar baıqalsa, onda jóndeýdi júzege asyrǵan merdigerlerdi jaýapqa tartý qajet», - dep tolyqtyrdy óńir basshysy.
Jumys toby músheleriniń qatysýymen oblys ortalyǵynyń ırrıgatsııalyq júıeleri máseleleri boıynsha kelesi otyrys naýryz aıynyń basynda ótetin boldy.
