Tarazdaǵy eski mektepter qaıta jańartylyp jatyr
TARAZ. QazAqparat – Taraz qalasyndaǵy irgetasy 1952 jyly qalanǵan №4 orta mekteptiń jańa ǵımaratynyń qurylysy qyzý júrgizilýde, dep habarlaıdy QazAqparat tilshisi.
Oblys ortalyǵyndaǵy qurylysy júrip jatqan bilim berý nysandaryn aralaǵan aımaq basshysy Berdibek Saparbaev aldymen atalǵan mekteptiń jaı-kúıimen tanysty.
Salynǵanyna 70 jylǵa jýyq ýaqyt bolǵan eskirgen oqý ordasynyń jańa ǵımaratynyń qurylysy belgilengen kestege sáıkes júzege asýda. Merdiger kompanııa – «Birlik Servıs ı Ko» jaýapkershiligi shekteýli seriktestigi. Aǵymdaǵy jyldyń mamyr aıynyń sońynda qurylysy bastalǵan nysan kelesi jyldyń naýryz aıynda paıdalanýǵa beriledi dep kózdelýde. Mektep 180 oqýshyǵa arnalǵan. Jańa joba boıynsha eski ǵımaratta bolmaǵan akt zaly, sport zaly, ashana, sheberhanalar qamtylmaq.
Sondaı-aq, №2 orta mekteptiń ornyna da jańa oqý ordasy salynbaq. 318 oqýshyǵa arnalǵan bilim nysanynyń eski ǵımaraty súrildi. Merdiger kompanııa «Talas Qurylys» JShS nysanda kelesi jyldyń basynda tapsyrýdy josparlap otyr. Jańa ǵımaratta ashana men májilis zaly bar.
Al, №16 orta mektep úsh ǵımarattan turady. Bir ǵımarat buzylyp, ornyna jańa ǵımarat salynady desek, ekinshi ǵımarat jóndeýdi qajet etýde. Qurylys jobasyna saraptama qorytyndysy birer kúnde ázirlenbek. Ol daıyn bolysymen qurylysshylar birden jumysqa kirisedi dep kútilýde. Úshinshi ǵımarat ázirge jaramdy.
Merdiger kompanııa ókilderimen áńgime barysynda Berdibek Saparbaev bekitilgen qurylys merzimderiniń saqtalý kerektigin atap ótti. Mektep alańdaryn abattandyrý da mańyzdy mindetteriniń biri.
- Eń bastysy – biz balalarǵa jaıly jáne qaýipsiz jaǵdaı jasaýymyz kerek. Oqýshylar jańa jabdyqtalǵan kabınetterdi kórip, marqaıyp qalýy tıis. Oblysta apatty jaǵdaıdaǵy, úsh aýysymdy jáne oryn tapshylyǵy bar mektepterdiń máselesi kezeń-kezeńmen sheshilýde. Sonymen qatar, bul rette materıaldyq bazaǵa ǵana emes, muǵalimderdiń sabaq ótý tásili men sapaly bilim berý jaıyna da aıryqsha nazar aýdarý kerek, - dedi Berdibek Saparbaev.
