Tarazdaǵy daýyl saldarynan 10 kópqabatty úıdiń shatyry búlinip, 40-qa jýyq aǵash qulaǵan
TARAZ. QazAqparat – Jambyl oblysynyń ákimi Berdibek Saparbaev Tarazdaǵy joıqyn jelden búlingen turǵyn úıler men nysandardy aralap shyqty, dep habarlaıdy QazAqparat tilshisi.
Jambyl dańǵylyndaǵy №123 úıdiń 120 sharshy metrlik shatyryn jel ushyryp áketken. 60 jyl buryn irgesi qalanǵan turǵyn úı buǵan deıin birde-bir ret kúrdeli jóndeýden ótpegen. Aımaq basshysy turǵyn úıdiń jaǵdaıymen tanysyp, turǵyndardy áńgimege tartty.
«Jańbyr jaýǵan shatyrdan sý aǵyp ketýine jol bermeý úshin ýaqytsha jabyn ornatylady. Degenmen, kún jylyǵannan keıin termojańǵyrtý baǵdarlamasy aıasynda úıge jóndeý jumystaryn júrgizý qajet», - dedi B. Saparbaev turǵyndarǵa.
Úıge PIK qyzmet kórsetedi, termojańǵyrtý baǵdarlamasyna qatysý úshin turǵyndardyń qoldary jınalyp úlgergen.
Sondaı-aq, shahardyń 15-shi shaǵyn aýdanyndaǵy №16 úıdiń shatyry da qatty jelden zardap shekken. Bes qabatty ǵımarat ótken jyly paıdalanýǵa berilgen bolatyn. Munda aýmaǵy 1000 sharshy metrden asatyn shatyr buzylyp, ushyp ketken. Shatyrdyń qulaýy kezinde kórshi úıdiń balkony men aýlada turǵan birneshe kólik búlingen.
Aıta keterligi, adam shyǵyny oryn alǵan joq. Qazirgi tańda aýlany qoqystan tazartý, elektrmen qamtýdy qalpyna keltirý jumystary júrgizilýde. Oblys ákimin kórgen birqatar turǵyndar, aımaq basshysymen birgen máseleni talqylaýǵa jınaldy.
Úıdiń qurylysyn júrgizgen merdiger barlyq jumystar normatıvter men bekitilgen jobaǵa sáıkes atqarylǵanyn aıtyp sendirýge tyrysty.
«Shatyr men kórshi úıdiń zaqymdanǵan bóligin qalpyna keltirý merdiger kompanııanyń moınyna júktelýi tıis. Shatyrdy qysqa merzimde qalpyna keltirý qajet. Endi mundaı oqıǵalardyń qaıtalanýyna jol berilmeýi kerek. Eger tek aýa-raıy ǵana sebep bolsa, onda basqa úılerdiń de shatyrlary ushyp keter edi ǵoı. Bul jerde qurylys sapasyna qatysty másele bar»,- dep atap ótti oblys ákimi.
Eske sala keteıik, Tarazda joıqyn daýyl saldarynan birqatar nysan zardap shekken bolatyn. Jeldiń ekpini 25 m/s-qa jetip, 10 kópqabatty turǵyn úı men 3 mekteptiń shatyry búlingen, elektr jelisiniń 3 baǵanasy jáne 40-qa jýyq aǵash qulaǵan. 20 baǵdarsham isten shyqqan.
Qazirgi ýaqytta daýyldyń saldaryn joıý boıynsha jumystar belsendi túrde júrgizilýde. Qulaǵan aǵashtardy tazalaý jalǵasýda. Eń aldymen kólik qozǵalysyna kedergi keltirmeý úshin joldar tazartyldy. Turǵyndardan elektr qýatymen qamtýdaǵy aqaýlarǵa qatysty ótinishter túsýde. Dál qazir bul sharalarǵa 20 brıgada jumyldyrylǵan.
Berdibek Saparbaev qala ákimine jel zardaptaryn joıý jumystaryn jedeldetýdi tapsyrdy.
«Búlingen mektepter dúısenbige deıin qalpyna keltirilýi tıis», - dedi oblys ákimi.
