Tarazdaǵy dámhanada bolǵan atysqa qatysty eki qylmystyq is qozǵaldy
TARAZ. QazAqparat - Áleýmettik jelide oblys ortalyǵyndaǵy tóbeles jáne atys oqıǵasy qyzý talqylanyp jatyr, dep habarlaıdy QazAqparat tilshisi.
Jambyl oblystyq ІІD ókilderi «QazAqparat» HAA tilshisiniń saýalyna jaýap berdi: «2018 jylǵy 16 naýryz kúni 20:50-de Taraz qalasy ishki ister basqarmasyna dámhanalardyń birinde klıentter tóbeles shyǵarǵany týraly habar tústi. Oqıǵa ornyna jetken patrýldyq ekıpaj kúzet agenttiginiń qyzmetkerleri men dámhananyń aqysyn tóleýden jaltarǵan klıentter arasynda tóbeles bolǵanyn anyqtady. Kúzetshilerdiń biri eki klıenttiń aıaǵyna qarýdan oq atyp, jaralaǵan. Oqıǵa saldarynan tórt adam aýrýhanaǵa jetkizildi».
Polıtsııa osy fakti Sotqa deıingi tergep-tekserýlerdiń biryńǵaı tizilimine QR KQ 239-babynyń («Buzaqylyq») 2-bóligimen tirkeldi. Tóbeles qatysýshylarynyń túsiniktemelerine baılanysty QR QK 252-babynyń («Jekeshe kúzet qyzmetteri qyzmetshileriniń ókilettikterin asyra paıdalanýy») 2-bóligi («Qarý nemese arnaıy quraldar qoldanyp jasalǵan nemese aýyr zardaptar keltirgen dál sol is-áreket») boıynsha da is qozǵaldy.
Birneshe saraptama belgilendi, sotqa deıingi tergep-tekserý júrip jatyr.
Eske sala keteıik, juma kúni, keshki ondar shamasynda №1 qalalyq aýrýhanaǵa «jedel járdem» oq tıip jaralanǵan jigitti jetkizgen. Jarty saǵat óter-ótpeste dál osyndaı jaraqatpen taǵy bir er adam ákelindi.
Taraz №1 qalalyq aýrýhanasy bas dárigeriniń orynbasary Erbol Ordabekov «Qalaı jaralanǵanyn ekeýi de aıtqan joq. Bireýi besinshi yqsham aýdanda, ekinshisi jetinshi yqsham aýdanda belgisiz birleýlerdiń oǵynan jaralanǵanyn ǵana aıtty», - degen bolatyn.
Illıýstratsııalyq foto
