Tarazdaǵy birqatar tutynýshylar bıylǵy jazda ystyq sýmen qamtamasyz etilmek
TARAZ. QazAqparat - Oblys ortalyǵynda jylý maýsymynyń aıaqtalýyna baılanysty jylý berýshi uıymdar ystyq sýdy da óshirmekshi, dep habarlaıdy QazAqparat tilshisi.
QR sanıtarlyq normalary boıynsha, jylý berý syrtqy aýa temperatýrasy+8 gradýs Tselsıı bolǵanda óshiriledi. Bıyl Jambyl oblysynda jylý maýsymy 31 naýryzdan 1 sáýirge qaraǵan túni saǵat 00.00-de aıaqtaldy.
«Taraztransenergo» MQK dırektory Erik Kósherbaevtyń aıtýynsha, oblys ortalyǵyndaǵy kommýnaldyq kásiporyndar josparly jóndeý jumystary saldarynan turǵyn úıler men áleýmettik nysandarǵa ystyq sý berýdi toqtatady.
«Uıymdastyrý-tehnıkalyq is-sharalar josparyna sáıkes, 16-29 sáýirde jylý jelilerin gıdrotehnıkalyq synaqtan ótkizý jáne jóndeý jumystary júrgiziledi. Taraz qalasynyń kóp bóligindegi tutynýshylarǵa ystyq sý 30 sáýirden 16 maýsymǵa deıin beriledi. Bul «Taraz energoortalyǵy» AQ qyzmet kórsetetin úılerge ǵana qatysty. «Jambyl-Jylý» MQK tutynýshylary 30 sáýirden 29 qyrkúıekke deıin ystyq sý paıdalanatyn bolady», - dep habarlady Erik Kósherbaev.
Oblys ortalyǵynda «Taraz energoortalyǵy» AQ 705 kóppáterli turǵyn úıge, «Jambyl-Jylý» MQK - 83, «Temirjol-Jylý» MQK - 19 kóppáterli turǵyn úıge qyzmet kórsetedi.
