Tarazdaǵy alǵashqy muz aıdyny arenasy 2018 jyldyń kúzinde beriledi
TARAZ. QAZAQPARAT - Tarazda ishinde muz aıdyny arenasy bar qaladaǵy alǵashqy sporttyq nysan turǵyzylyp jatyr, dep habarlaıdy «QazAqparat» HAA tilshisi qala ákimdiginiń baspasóz qyzmetine silteme jasaı otyryp.
Tarazǵa muz aıdynynyń qajettiligi týraly áńgimeler alǵash ret 2012 jyly aıtyla bastaǵan bolatyn. Ǵımarat qurylysy Jeńis saıabaǵynda júrgiziledi dep josparlanǵan. Alaıda daıyn joba sol qalpy iske aspady.
Bıyl mamyr aıynda qaladaǵy shaǵyn aýdandardyń birinde jekemenshik kompanııalardyń biri tóbesi jabyq syrǵanaq ashty. Qazir bul jer jambyldyq balalardyń súıikti ornyna aınalǵan. Taǵy bir shaǵyn muz aıdyny birneshe jyldan beri salynyp jatqan megamarkettiń ishine josparlanǵan. Qurylysty «Vivat-Taraz» JShS, «Ejelgi Taraz» arheologııalyq baǵynyń terrıtorıasynda júrgizýde.
Qazir Tarazdyń ortalyǵyndaǵy Qaırat Rysqulbekov atyndaǵy saıabaq mańyna eki qabatty ǵımarat salynyp jatyr. Muz aıdynymen qosa 500 kórermenge arnalǵan trıbýnasy bar nysannyń jalpy qurylys aýmaǵy - 4,1 myń sharshy metrdi quraıdy. Qurylystyń bas merdigeri - «NefteHımPrıbor» JShS.
Qazirgi tańda Taraz qalasynyń ortalyǵynda, Qaırat Rysqulbekov atyndaǵy qalalyq saıabaqtyń janynan ekiqabatty ǵımarat salynyp jatyr. Bul muz aıdyny 500 kórermenge arnalyp boı kóterýde. Qurylys alańynyń aýmaǵy 4,1 myń sharshy metrdi quraıdy. Bas merdiger - «NefteHımPrıbor» jaýapkershiligi shekteýli seriktestigi.
Mamyrda bastalǵan sport nysanynyń qurylysy aldaǵy jyldyń 1 qyrkúıeginde, ıaǵnı, Bilim kúnine deıin tolyq aıaqtalýy kerek.
«Bizdiń óńirde qysqy sport túrleri múldem damymaǵan dep aıtýǵa bolady,-dedi «QazAqparat» Halyqaralyq aqparat agenttiginiń tilshisine bergen suhbatynda oblystyq dene shynyqtyrý jáne sport basqarmasynyń eks-basshysy Gamlet Qaınarbekov. - Bul - qary az, óńirimizdiń jyly tabıǵatymen de baılanysty bolsa kerek. Qalada Muz saraıynyń paıda bolýy osy olqylyqtardyń ornyn toltyryp, keıbir qysqy sport túrinen bizdiń kórsetkishterimizdi de jaqsartýy kerek. Ázirge, shańǵy, konkı, mánerlep syrǵanaý sııaqty sport túrlerinen elimizdiń soltústik jáne shyǵys óńirleri ozyp tur.
