Tarazdaǵy janarmaı quıý beketine jarty mıllıon teńgege jýyq aıyppul salyndy
ASTANA. KAZINFORM – Taraz qalasyndaǵy janarmaı quıý beketteriniń birinde metrologııalyq talaptardyń buzylǵany anyqtaldy.
QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Jambyl oblysy boıynsha departamenti azamattyń ótinishi negizinde jospardan tys tekserý júrgizgen.
Tekserý barysynda tutynýshylarǵa munaı ónimderin quıý kezinde paıdalanylǵan janarmaı quıý baǵanynyń qoldanystaǵy salystyryp tekserýden ótpegeni jáne onyń jaramdylyǵyn rastaıtyn sertıfıkaty bolmaǵany belgili boldy.
«Munaı ónimderin ótkizý kezinde qoldanylatyn ólsheý quraldary memlekettik metrologııalyq baqylaý nysandaryna jatady jáne paıdalaný kezeńinde mindetti túrde tekserýden ótýge tıis. Tekserý barysynda zańnama talaptarynyń saqtalmaǵany anyqtaldy. Osyǵan baılanysty kásipker ákimshilik jaýapkershilikke tartylyp, anyqtalǵan buzýshylyqtardy joıý jóninde nusqama berildi», – dep habarlady vedomstvo.
Tekserý qorytyndysy boıynsha kásipker Ákimshilik quqyq buzýshylyq týraly kodekstiń 419-baby boıynsha jaýapkershilikke tartyldy.
Salynǵan aıyppul mólsheri 230 aılyq eseptik kórsetkishti qurady. Qysqartylǵan tártippen kásipker 115 AEK nemese 497 375 teńge kóleminde aıyppul tólegen.
Sonymen qatar janarmaı quıý beketiniń qyzmetin ólshem birligin qamtamasyz etý salasyndaǵy zańnama talaptaryna sáıkestendirý jóninde nusqama berildi.
Aıta keteıik, Qyzylordada tabıǵı monopolııa talabyn buzǵan aýrýhanadan aıyppul óndirildi.
