Tarazdaǵy mekteptiń qurylysy depýtat nazarynda

ASTANA. KAZINFORM – Májilis depýtaty, «AMANAT» partııasy fraktsııasynyń múshesi Muqash Eskendirov Jambyl oblysyna jumys sapary aıasynda Taraz qalasyndaǵy birqatar nysandardy aralap júr. Búgin №15 mektepke japsarlas salynyp jatqan ǵımarattyń qurylys barysymen tanysty.

Májilis depýtaty halyqpen kezdesý barysynda partııanyń «Halyqpen birge!» saılaýaldy baǵdarlamasyn jergilikti jerlerde iske asyrý sapasyn taldaýǵa erekshe kóńil bólýde. 

Baǵdarlamada áleýmettik salaǵa basa mán berilgen. Sondyqtan depýtat №15 mektepte júrip jatqan qurylys jumysyn jeke baqylap qaıtty.

– Jalpy 781 bala bilim alatyn ǵımarat biraz ýaqyttan beri oqýshylarǵa tarlyq etti. «AMANAT» partııasynyń depýtattary osyny eskere kele, byltyr quzyrly organdarǵa mektepke japsarlas ǵımarat salý týraly usynys aıttyq. Máseleni sheshý maqsatymen bıyl oblystyq bıýdjetten 2,5 mlrd teńge bólinip, 300 orynǵa arnalǵan ǵımarat salyna bastady, – dedi depýtat. 

Josparǵa sáıkes qurylys jumysy keler jyldyń aqpan aıynda aıaqtalýǵa tıis.

Bul jańalyq jergilikti turǵyndardy qýantty. Sebebi keı ata-analar balalaryn turǵylyqty jerinen shalǵaı ornalasqan mektepke aparýǵa májbúr.

– Bul mektepte oqýshylar kóp, sol sebepti balalarǵa oryn jetispeıdi. Men ulymdy basqa shaǵyn aýdanda ornalasqan mektepke aparýǵa májbúrmin. Endi mekteptiń salynyp jatqan jańa ǵımaraty ashylǵan boıda balamdy osy jerge aýystyramyn. Biz úshin bul óte jaqsy jańalyq, – deıdi jergilikti turǵyn Ádilet Ashatuly.

Aıta keteıik, partııanyń saılaýaldy baǵdarlamasy aıasynda óńirde ótken jyly 2550 oqýshyǵa arnalǵan 5 jańa mektep salynyp, 3 mektep kúrdeli jóndeýden ótti. Sondaı-aq Merki aýdany Merki aýylynda 300 oryndyq balalar mýzyka mektebi paıdalanýǵa berildi.

Al 2024 jyly 5000-nan astam orynǵa arnalǵan 9 mektep salý kózdelip otyr.