Tarazdaǵy fosfor zaýytynda eki adam qaza tapty

TARAZ. KAZINFORM – Taraz qalasyndaǵy fosfor zaýytynda eki birdeı adam ólimimen aıaqtalǵan óndiristik oqıǵa tirkeldi. Bir jumysshy ystyq shlaktyń syrtqa shyǵýy saldarynan kóz jumsa, taǵy bir azamat mıneraldy tyńaıtqyshtar zaýytynda karerlik aýyr júk kóliginiń astyna túsip qaza tapty.

Jýyrda jurtshylyqqa «Qazfosfat» JShS qurylymyna kiretin kásiporyndarda oryn alǵan eki birdeı ólim jaǵdaıy belgili boldy.

Alǵashqy oqıǵa 29 qańtar kúni Jańa Jambyl fosfor zaýytynda bolǵan. №5 tsehta jumystar júrgizý kezinde peshten ystyq shlak syrtqa atqylaǵan. Rastalmaǵan málimetterge sáıkes, sary fosfor óndirý boıynsha eki apparatshy men bir slesar kúıik jaraqatyn alyp, úsheýi de qalalyq kópsalaly aýrýhanaǵa jetkizilgen.

Apparatshylardyń biri denesiniń 45 paıyzyna deıin jetken termohımııalyq kúıikpen jáne tynys alý joldarynyń kúıigimen jansaqtaý bólimine túsken. Dárigerler onyń jaǵdaıyn bastapqyda aýyr dep baǵalaǵan. Alaıda medıtsına qyzmetkerleriniń barlyq kúsh-jigerine qaramastan, er adamdy aman alyp qalý múmkin bolmady.

Ekinshi qaıǵyly oqıǵa mıneraldy tyńaıtqyshtar zaýytynda tirkelgen. Kýágerlerdiń aıtýynsha, júk kólikteri biriniń júrgizýshisi avtokólik bortyna júkti bekitýge árekettengen sátte artqa qozǵalyp kele jatqan BelAZ karerlik samosvaly ony qaǵyp ketken. Alǵan jaraqattarynan er adam oqıǵa ornynda kóz jumǵan.

Atalǵan derek boıynsha polıtsııa QR Qylmystyq kodeksi 345-babynyń 3-bóligi boıynsha sotqa deıingi tergep-tekserý bastady. Atalǵan baptyń sanktsııasy bes jylǵa deıin bas bostandyǵynan aıyrý jazasyn kózdeıdi.

Qazirgi ýaqytta kompanııa tarapynan bolǵan qaıǵyly oqıǵalarǵa qatysty resmı túsinikteme berilgen joq.

Buǵan deıin Oral qalasynda óndiris ornynda 39 jastaǵy jumysshy qaza tapqany habarlanǵan bolatyn.