Tarazdaǵy 1 439 kóppáterli úıge jylý 12 qazannan berile bastaıdy
ASTANA. KAZINFORM – Tarazda jylý berý maýsymy 8 qazanda bastalady. Tutynýshylardy jylý júıesine qosý kezeń-kezeńimen júrgiziledi, dep habarlaıdy Kazinform agenttiginiń tilshisi.
Jylý berý maýsymy aldymen áleýmettik nysandardy jylý júıesine qosýdan bastalady. Turǵyn úılerge jylý 12 qazannan bastap beriledi. Barlyq jumysty bes kúntizbelik kún ishinde aıaqtaý josparlanǵan.
Taraz qalasynyń ákimdiginiń málimetinshe, jylý berý merzimi ákimniń 7 qazandaǵy ókimimen bekitilgen. Tutynýshylardy qosý eki kezeńmen júrgiziledi.
8 qazan túngi saǵat 00:00-den bastap áleýmettik nysandarǵa jylý beriledi. Birinshi kezekte densaýlyq saqtaý, bilim berý uıymdary jáne basqa da áleýmettik mańyzy bar nysandar qosylady.
Ekinshi kezeń 12 qazan túngi saǵat 00:00-de bastalady. Bes kún ishinde 1 439 kóppáterli turǵyn úıdi ortalyqtandyrylǵan jylý júıesine qosý josparlanǵan.
Jylý berýdi bastamas buryn úılerdi basqarý organdary, PIK jáne OSI úı ishindegi jylý jelileri men jabdyqtaryn tekserýi qajet. Sondaı-aq mamandardyń jylý toraptaryna kirýine jaǵdaı jasalýy tıis. Turǵyndardan páterlerdegi jylý júıelerin jóndeý jumystaryn aıaqtaý suraldy.
Ákimdik jaýapkershiliktiń bólingenin eske saldy. Jylý jelileri jylý tasymaldaǵyshty úıdiń kireberisine deıin jetkizip, elevator toraptaryn qosady. Al ǵımarat ishindegi jylýdy iske qosý, retteý jáne oǵan qyzmet kórsetý jumystaryn úılerdi basqarý organdary, PIK jáne OSI qamtamasyz etedi.
Jylýmen qamtý máseleleri boıynsha turǵyndar «Taraztransenergo» dıspetcherlik qyzmetine 34-37-28 nómiri arqyly jáne «Jambyl-Jylý» dıspetcherlik qyzmetine 34-43-28 nómiri arqyly táýlik boıy habarlasa alady.
Osyǵan deıin jylý berilgen turǵyn úıde páter jylymasa, qaıda júginý kerektigi týraly jazdyq.
