Tarazda zorlanǵan 7-synyp oqýshysy aýrýhanaǵa jatqyzyldy
TARAZ. QazAqparat – Tarazda azǵynnan zardap shekken oqýshy qyz aýrýhanaǵa jatqyzyldy. El arasynda taraǵan jábirlenýshige kúdiktiden ınfektsııalyq aýrý juqty degen aqparat jalǵan bolyp shyqty, - dep habarlaıdy QazAqparat tilshisi.
Buǵan deıin Tarazdaǵy №6 mekteptiń 7 synyp oqýshysynyń atalǵan bilim ordasynyń ájethanasynda zorlanǵandyǵy, kúdiktiniń qolǵa túskendigi, oǵan jaýapty basshylardyń jumystan qýylǵandyǵy týraly habarlaǵan bolatynbyz. Bul oqıǵa qoǵamda úlken rezonans týdyrdy.
Buǵan deıin úı jaǵdaıynda emdelgen azǵynnan azap shekken jetkinshek búgin aýrýhanaǵa jatqyzyldy. Al, áleýmettik jelilerde oǵan azǵyndyq jasaǵan azamattan teri aýrýy juqty degen aqparatty densaýlyq basqarmasy joqqa shyǵardy.
«Oqýshy oblystyq balalar aýrýhanasynda 10 kúndeı jatady. Jaǵdaıy qazir jaqsy jáne birqalypty. Al, oǵan azǵyndyq jasaǵan adamnan aýrý juqty degen aqparat shyndyqqa janaspaıdy»,-deıdi oblystyq densaýlyq saqtaý basqarmasy basshysynyń orynbasary Jibek Isaeva.
Al, kúdikti endi 30 jylǵa jýyq ómirin temir torda ótkizýi múmkin. Bul týraly oblystyq polıtsııa departamentiniń basshysy Arman Orazalıev habarlady.
Onyń aıtýynsha, atalǵan kúdikti 17 jasynda zorlaý qylmysy úshin sotty bolǵan. 4 jyl merzimin abaqtyda ótep, bir jyldy shartty túrde ótegen.
