Tarazda jylyna 15 mln ekspress-test shyǵaratyn zaýyt salynyp jatyr
Keshende ekspress-tester men medıtsınalyq buıymdar shyǵarylatyn bolady. Jylyna 15 mıllıon ekspress-test, 1,5 mıllıon baqylaý eritindisi jáne 50 myńǵa jýyq zararsyzdandyrý oramasyn shyǵarý josparlanýda.
Eraly Toǵjanov óndiris jelisin, dári-dármekter men medıtsınalyq buıymdardyń qoımasyn aralap, seriktestiktiń jumysyn joǵary baǵalady.
Úkimet basshysynyń orynbasary dárigerlerge janqııarlyq eńbegi úshin alǵys aıtyp, Memleket basshysy koronavırýsqa qarsy is-qımyl boıynsha Úkimet pen dárigerlerdiń aldyna naqty mindetter qoıǵanyn atap ótti.
«Bizdiń mindetimiz - barlyq osy tapsyrmalardy oryndaý. Bul úshin dári-dármekterdiń eki aılyq qory qalyptasty, densaýlyq saqtaý mekemeleriniń materıaldyq-tehnıkalyq bazasy jańartylýda. Jambyl oblysynyń shalǵaı eldi mekenderin sapaly medıtsınalyq kómekpen qamtamasyz etý úshin segiz mobıldi keshen alyndy, jedel járdem stantsııasynyń avtoparki jańartylýda. Munyń bári qajetti kómekti der kezinde kórsetýge múmkindik beredi», - dedi ol.
Jumys saparynyń qorytyndysy oblystyq ákimdiktegi beıne-baılanys arqyly ótken keńeste saralandy. Aımaq basshysy Berdibek Saparbaev óńirde memlekettik baǵdarlamalar sátti júzege asyrylyp jatqanyn atap ótti. El Prezıdentiniń árbir tapsyrmasynyń oryndalýy qatań baqylaýda.
«Sanıtarlyq-epıdemıologııalyq jaǵdaı turaqty. Medıtsınalyq mekemeler koronavırýstyń yqtımal ekinshi tolqynyna daıyndalýda. Atap aıtsaq, medıtsınalyq qural-jabdyqtar satyp alynýda. Dári-dármek qory qalyptasty. Qaýipti vırýspen kúresýge qosymsha dárigerler tartylady. Mobıldi toptardyń qyzmeti jandana túsýde», - dep atap ótti oblys ákimi.
Berdibek Saparbaev densaýlyq saqtaý jáne bilim berý salalaryna qatysty máselelerdi atap ótti. Eraly Toǵjanov olardyń barlyǵy qarastyrylatynyna sendirdi.
«Áleýmettik-ekonomıkalyq damýdyń nátıjeleri jaman emes. Júrgizilgen profılaktıkalyq sharalardyń nátıjesinde COVID-19 aýrýshandyǵy tómendedi. Biz osy qarqynmen jumys isteýdi jalǵastyrýymyz kerek», - dep qorytyndylady Eraly Toǵjanov.
Eske salsaq, Jambyl oblysyna sapary barysynda Eraly Toǵjanov COVID-19-ǵa qarsy otandyq vaktsına shyǵaratyn zaýytty salý barysymen tanysty.