Tarazda jyl sońyna deıin 148 kóshe jóndeledi
TARAZ. QazAqparat – Aǵymdaǵy jyldyń sońyna deıin Taraz qalasynda 78 shaqyrymdyq 148 kóshe joly, burylystar men tuıyqtar ortasha jóndeýmen qamtylady , dep habarlaıdy QazAqparat.
Búginde bul jumystar bastalyp ketti. Qazirgi tańda shahardyń «Shalǵaı Qarasýda» aýdanynda uzyndyǵy 520 metrdi quraıtyn Prıbalhashskaıa kóshesinen Anarbaev kóshesine deıin qalyńdyǵy 6 sm bolatyn asfalt jabyndysy tóselýde. Odan ózge munda balalardyń qaýipsizdigi úshin № 21 mektepke deıin jaıaý júrginshiler joly salynatyn bolady. Taraz qalasy ákiminiń baspasóz hatshysy Gúlbahram Dúısekova qurylys sapasy mamandardyń qatań qadaǵalanýynda ekenin málim etti.
«Aıta ketý kerek, bıylǵy jyly qalada«Taıvan», «Araı» turǵyn alaby ortasha jóndeý jumystarymen qamtylady. Budan bólek, jergilikti bıýdjet esebinen 600 mln teńgege qalanyń kópqabatty turǵyn úıleri ornalasqan shaǵyn aýdandardaǵy jol jabyndylaryn aǵymdaǵy jóndeý jumystary atqarylatyn bolady»,- deıdi G.Dúısekova.
Sol sııaqty qalaǵa qarasty «Býryl A,B,V» turǵyn úı alabynyń 26 shaqyrymdy quraıtyn 50 kóshesine 260 mıllıon teńgege shaǵal tas tóselýde. Jumystardy «Aııa servıs» JShS júrgizýde. Búginde munda shaǵal tastardyń birinshi qabaty salynyp jatyr. Aldaǵy ýaqytta tehnıkalyq talaptarǵa sáıkes ekinshi qabaty júrgiziletin bolady.Nysannyń qurylysy kelesi jylǵa ótpeli bolǵanmen, merdiger kompanııa jumystardy kesteden buryn, jyl sońyna deıin tapsyrýdy kózdep otyr.
