Tarazda jyl sońyna deıin 100 qoǵamdyq kólik jańartylady

TARAZ. QazAqparat – Tarazda qalalyq baǵyttar boıynsha avtobýstardy jańalaý máselesi júıeli túrde júzege asyrylyp keledi, dep habarlaıdy QazAqparat tilshisi.

Ótken jyly qala avtoparkteri 71 birlik nemese 15 paıyzǵa jańa avtobýstarmen qamtylǵan bolsa, aǵymdaǵy jyldyń sońyna deıin 100 avtobýspen nemese 21 paıyzǵa jańartý josparlanyp otyr. Bul týraly oblystyq Jolaýshylar kóligi jáne avtomobıl joldary basqarmasynyń basshysy Baqytjan Jánibekov aıtyp berdi. Sondaı-aq ol qaladaǵy barlyq 670 avtobýstyń 213-iniń tozyǵy jetkenin, paıdalaný merzimderi 7 jyldan asqandyǵyn jetkizdi.

Basqarma basshysy qoǵamdyq kólikpen qamtylmaǵan eldi mekenderge avtobýs qatynasy uıymdastyrylyp jatqanyn da tilge tıek etti.

«Aýdanaralyq avtobýs marshrýttaryna ońtaılandyrý jumystary júrgizildi. Máselen, birin-biri qaıtalaıtyn baǵyttar sany qysqartylyp, onyń ornyna qoǵamdyq kólikpen qamtylmaǵan eldi mekenderge avtobýs qatynasy uıymdastyryldy. Nátıjesinde 84 aýdanaralyq baǵyttan 72 naqty qajetti baǵyttar qaldy», - dedi B.Jánibekov.