Tarazda júzjyldyq úıler qaıta jańǵyrtylady
TARAZ. QazAqparat - Taraz bıligi qala ortalyǵynda birneshe tarıhı kezeńderdi biriktiretin aýqymdy týrıstik alań ashýdy josparlap otyr, dep habarlaıdy QazAqparat tilshisi.
Jambyl oblystyq týrızm basqarmasy ókilderiniń aıtýynsha, óńirdiń ishki týrızmdi damytý kartasyna jańa kórikti meken - «Áýlıe ata dáýiri» dep atalatyn tarıhı-mádenı nysandar engizilgen.
«Tarazdaǵy týrıstik keshen burynǵy Kók bazardy ǵana emes, oǵan japsarlas jatqan turǵyn úılerdi de qamtıdy. Ol úıler de biregeı tarıhymen erekshelenedi. HІH ǵasyrdyń sońy men HH ǵasyrdyń bas kezinde bul aýmaqta saýda lápkeleri, dúkender salynǵan. Tóńkeristen keıin ǵımarattardyń kópshiligi memlekettik mekemelerge berilgen», - deıdi týrızm basqarmasynyń basshysy Qarlyǵash Aralbekova.
Onnan astam eski úılerdiń tarıhı qundylyǵy bar. Biraq olardyń kópshiligi qazir jekemenshiktiń ıeliginde, aıanyshty halde. Óıtkeni olardyń ıelerine biregeı ǵımarattardy óz maqsatyna paıdalanýǵa tyıym salynǵan. Endi bılik olardy kúrdeli jóndeý arqyly tarıhı-mádenı týrıstik keshen aıasynda qaıta jandandyrýdyń joldaryn qarastyryp jatyr.
«Jambyl oblysynyń ákimi Asqar Myrzahmetov munda kelip, kóne úılerdiń jaǵdaıyn kórdi. Ol jurtshylyqpen, úılerdiń ıelerimen kezdesip, qıyn jaǵdaıdan shyǵý týraly usynystaryn tyńdady. Ákimniń tapsyrmasymen jasaqtalǵan arnaıy komıssııa ǵımarat ıeleriniń osy úılerdi saqtalǵan tarıhı qujattar negizinde burynǵy qalpyna keltirýge daıyn ekenin anyqtady», - deıdi Qarlyǵash Aralbekova.
Jambyldyq tarıh áýesqoılarynyń «Obelısk» qoǵamdyq birlestigi kóne úılermen shektelmeı, kóne tósemeli joldy da qalpyna keltirý bastamasyn kóterip jatyr. Budan tys, áýesqoılar Turar Rysqulov atyndaǵy saıabaqtyń janynan «Keńestik kezeń saıabaǵyn» salýdy usyndy.
Taraz qalasynyń ákimi Saılaýǵaly Baınazarovtyń aıtýynsha, ǵımarat ıeleriniń keıbiri úılerdi óz qarjysyna jóndeýge ázir. Kóne úılerge qanshalyqty zaqym kelgenin jáne olardy aldaǵy ýaqytta paıdalaný múmkindikterin anyqtaý úshin árbir nysanǵa saraptama júrgizý qajet.
Bolashaqta «Áýlıe ata sharshysy», «Keńestik kezeń saıabaǵy», kıeli Qarahan kesenesi, Dáýitbek kesenesi, ejelgi meshit jáne «Ejelgi Taraz» tarıhı-mádenı ortalyǵyn biryńǵaı týrıstik jaıaýjolmen biriktirý josparlanýda.
Aıta keteıik, Tarazda jyl basynan beri ǵımarattardy, saıabaqtardy, baqtardy jáne jalpy qalalyq ınfraqurylymdy aýqymdy jóndeý jumystary júrip jatyr.
