Tarazda JShS dırektory 1,5 mln teńge para úshin 45 mln teńge aıyppul tóleıdi

NUR-SULTAN. QazAqparat – «Turǵyn úı jóndeý – Taraz» JShS dırektory 1,5 mln teńge para alǵany úshin 45 mln teńge aıyppul tóleıdi. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov málim etti, dep habarlaıdy QazAqparat.

«21 qazanda Taraz qalasy № 2 sotynyń úkimimen «Nurly jer» memlekettik baǵdarlamasy aıasynda bólingen 10 mln teńge somasynda bıýdjet qarajatyn jedel aýdarǵany úshin kompanııa dırektorynan 1,5 mln teńge somasynda para alý kúdigine ilingen «Turǵyn úı jóndeý – Taraz» JShS dırektory (memlekettiń 100% úlesi, quryltaıshysy – Taraz q. ákimdigi) S.J. Myrzalıev paranyń otyz eselengen somasy, ıaǵnı 45 mln teńge mólsherindegi aıyppul tóleý jazasyna tartyldy», - dedi D. Bıǵaıdarov Facebook paraqshasynda ótken onlaın brıfıngide.

Aıta keteıik, eki apta ishinde Sybaılas jemqorlyqqa qarsy qyzmetpen buryn aıaqtalǵan qylmystyq ister boıynsha 23 adamǵa qatysty 17 aıyptaý úkimi shyǵaryldy, olardyń 15-i ártúrli deńgeıdegi basshylar.

Bas bostandyǵynan 7 adam aıyryldy, beseýiniń bas bostandyǵy shekteldi, eselik aıyppul somasy 80 mln teńgeden astam eselik aıyppuldarǵa 10 adam tartyldy. Sonymen qatar, jymqyrý faktileri boıynsha - 4, alaıaqtyq úshin – 3, para bergeni úshin - 3, para alǵany úshin – 10 jáne qujattardy burmalaǵany úshin 2 adam jazaǵa tartyldy.