Tarazda jol erejesin buzyp, ony ınternette jarııalaǵan júrgizýshi ustaldy
TARAZ. QazAqparat - Tarazda tótenshe jaǵdaı rejımin jáne jol qozǵalysy erejelerin buzǵan júrgizýshi jaýapkershilikke tartyldy, dep habarlaıdy Polisia.kz.
Áleýmettik jelilerde jol qozǵalysy erejelerin buzyp qana qoımaı, el aýmaǵyna engizilgen tótenshe jaǵdaı rejımin de elemegen «Lada» kóliginiń júrgizýshisine qatysty beınejazba jarııalandy. Taraz qalasynyń kóshelerinde shekten shyqqan tártipsiz áreketteri beınelengen belgisiz tulǵanyń beıne túsirilimi jelide keń taralyp, tártip saqshylarynyń nazarynan tys qalmady.
Beınejazba boıynsha jedel-izdestirý jumystaryn júrgizgen Taraz qalasynyń polıtsııa basqarmasy jol-patrýldik polıtsııa batalonynyń qyzmetkerleri «Lada 21703» markaly avtokóliginiń 23 jastaǵy júrgizýshisiniń jeke basyn anyqtap, jaýapkershilikke tartty.
Quqyq buzýshyǵa qatysty QR Ákimshilik quqyq buzý kodeksiniń 601-babynyń 2-bóligimen (jol belgilerimen nemese joldyń júrý bóliginiń tańbalarymen belgilengen talaptardy saqtamaý), 590-baptyń 5-bóligimen (kólik quraldaryn paıdalaný erejelerin buzý, atap aıtqanda júrgizýshige sholýdy shekteıtin zattardy ornatý) jáne 590-baptyń 9-bóligimen (memlekettik nemese mindetti tehnıkalyq baıqaýdan ótpegen kólik quralyn basqarý) ákimshilik hattama toltyryldy.
Jambyl oblysynyń polıtsııa departamenti júrgizýshilerge tótenshe jaǵdaı rejımi kezinde qozǵalysty barynsha shektep, asa qajet bolǵan jaǵdaıda ǵana jolǵa shyǵýdy, saq bolýdy eskertedi.
Kólik júrgizýshileri jol qozǵalysy erejelerin, jol belgileriniń nusqamalaryn qatań saqtap, kólik quraldarynyń turaqqa qoıylýy men toqtaýy, paıdalaný erejelerin jaýapkershilikpen múltiksiz oryndaýy qajet.
